Girtiyê nexweş Soydan Akay ku li Girtîgeha bi Ewlekariya Bilind a Hejmara 9’emîn a Marmarayê li hucreya yek kesî di tecrîdê de tê ragirtin, rewşa wî ıya tenduristiyê nebaş dibe. Akay ku berdana wî tê astengkirin, tenê meha Adarê heft caran rakirin nexweşxaneyê. Akay çar caran ji ber enfeksiyona kardiyolojîk, sê caran ji ber krîza dil û nexweşiya tansiyonê rakirin nexweşxaneyê.
Di 26’ê Adarê de ji ber heman nexweşiyê rakirin nexweşxaneya li kampusa girtîgehê û bi gotina ‘tansiyona bilind e’ ew li koxûşê vegerandin. Malbata Akay piştî ku bi rewşa kurê xwe hesiya, ewraqên nexweşxaneyê nîşanî doktorên cuda da. Doktorên ku rapor lêkolîn kirin tespît kirin ku Akay krîza dil derbas kiriye.
Di Hezîrana 2018’an de teşhîsa kansera prostat li Soydan Akay hate danîn. Romatîzma li movikan, hepatît B û spazma dil jî di nav de gelek nexweşî li Soydan Akay peyda bûne. Li gel hemû nexweşiyan jî berdana Akay ji aliyê Desteya Çavdêrî û Îdareyê ya Girtîgehê ve 10’ê Sibatê cara çaremîn hate astengkirin.
Soydan Akay ê ji navçeya Gimgim a Mûşê, ji salên lîseyê û pê ve tevlî nava Tevgera Azadiyê ya Kurd bû. Di sala 1993’an de li Îzmîrê di operasyonekê de hate binçavkirin û li emniyetê êşkenceyeke giran lê hate kirin. Bi îdîaya ‘Hewldana cihêkirina beşek ji xaka welêt a di bin serweriya dewletê de ye ji rêveberiya dewletê cihê bike’ hate darizandin û destpêkê cezayê darvekirinê lê hate birîn. Piştre jî bi guhertina qanûnî re ceza veguherandin cezayê girtîgehê yê heta bi hetayê.
Akay di nava 32 salên girtîhiştinê de li girtîgehên Îzmîr, Aydin, Amed, Sêrt, Mûş û Stenbolê hate hiştin.
Parlamentera Wanê ya DEM Partiyê Gulcan Kaçmaz Sayyîgît têkildarî rewşa Soydan Akay pêşnûme pirsek pêşkêşî Wezîrê Edaletê Yilmaz Tûnç kir û fikarên ji ber nexweşî û pêvajoya tedawiyê ya têkildarî Akay anî ziman.
