Platforma Ekolojiyê ya Şirnexê, li dijî qirkirina xwezayê li qada Omer Kabak a Şirnexê daxuyanî da. Endam û nûnerên saziyên sivîl û partiyên siyasî yên giredayî Platforma Kêd û Demokrasiyê ya Şirnexê, Cîgirê Hevserokê Giştî yê Partiya Herêmên Demokratîk (DBP) Huseyîn Bîrlîk, hevşeredarên navçeyên Şirnexê yên Partiya Wekhevî û Demokrasiyê ya Gelan (DEM Partî) û gelek kes tevlî daxuyaniyê bûn. Girsê beriya daxuyaniyê li qada Cumhuriyetê heta qada Omer Kabak meşiyan. Girseyê di meşê de pankarta “Hebûna xwezayê xwebûna me ye” hilgirtin û dovîzên “Dar û daristanên Botanê qirkirin faşîst û hovan”, “Hebûna xwezayê pêşeroja me ye” û “Polîtikayên li dijî erdnîgariyê ti car qebûl nakin” rakirin.
Girseyê heta qada Omer Kabak bi berzkirina dirûşmeyên, “Cûdî azad e wê azad bimîne”, “Xweza jiyanê jiyanê nekuje”, “Bijî berxwedana Cûdî”, “Dar birîn talan e, berxwedan jiyan e”, “Şirnex ranekeve xwedî li xwezayê derbikeve” û “Bê xweza jiyan nabe” meşiyan. Li qada Omer Kabak di navbera girseyê û polîsan de alozî derket û girseyê bi dirûşmeyan bertek nîşanî mudaxaleya polîsan dan.
Di daxuyaniyê de berdevkê Tevgera Ekolojiyê ya Mezopotamyayê Adnan Şenbayram axivî û anî ziman ku di sala 2018’an vir ve li Sirnexê dar tên birîn û wiha got: “Xwezaya Şirnexê tê qirkirin. Aştî ji gundên ku hatin şewitandin û darên wê hatinê birîn destpê dike. Aştî bi dawî anîna qirkirina xwezayê vê destpê dike. Em li vir bang dikin. Em li vir ji bo siya ku li me hatiye dizîn dimeşin. Taxrîbata li Gabarê bibînin. Em ji rayedarên dewletê re dibêjin ku heke hûn ji dilbin bi gotina, “Xweza nayê talankirin” wê li cem me bibûna. Em dibêjin werin bi hev re xwezaya xwe biparêzin.”
Piştrê jî Cîgirê Hevserokê Giştî yê DBP’ê Huseyîn Bîrlîk axivî. Huseyîn Bîrlîk bi lêv kir ku nezikatiya li dijî gel di heman demê a li dijî xwezayê ye û wiha domand: “Xwezaya Kurdistanê talan kirine. Em vê yekê qebûl nakin. Heke aştiyeke bibe divê bi hev re bibe. Em nezikatiya emniyeta Şirnexê ku xwest me asteng bike jî qebûl nakin. Ew gel ji bo xwezaya xwe biparêze îro li ber xwe dide. Ew yek ji bo vê komarê şerm e. Em bang li hemû saziyên dewletê yên alaqadar re dibêjin divê ew qîrkirin bi dawî bibe. Digotin ewlehî lê edî hewcedarî nema. Birêz Ocalan bang li rêxistina xwe kir û di 12’ê Gulanê de PKK’ê xwe fesîx kir. Edî nikarin ewlehiyê weke hincet nîşan bidin. Aştî ji xwezayê destpê dike. Ji Cûdî û Gabar destpê dike.”
Serokê CHP’ê yê Şirnexê Saît Namdar jî bertek nîşanî qirkirina xwezayê da û got: “Darbirîn ne ji bo ewlehiyê edî ji bo aboriye tên kirin. Birîna daristanên me zirarê dide ekosîstema me. Em weke CHP dibêjin dawî li qirkirina xwezayê bînin.”
Endamê OHD’ê Serfiraz Azad jî destnîşan kir ku ew ê ji aliyê hiqûqî ve têkoşîna li dijî xwezayê bidomînin û ev tişt anîn ziman: “Beriya meheke me serî li daristana bajêr da. Em li benda bersivê ne. Li gor bersivê em ê rêyên hiqûqî vê ji bo pêşî li qirkirina xwezayê bigrin têkoşîna xwe bidomînin.”
Daxuyanî bi berzkirina dirûşmeyan bi dawî bû.
