Di serdana fermî ya Serokê Filistînê Mahmud Abbas a ji bo Lubnanê de, planek ji bo bêçekkirina kampên penaberên Filistînî yên li wî welatî lihevkirin çêbû. Rayedarekî Lubnanê yê ku nexwest navê xwe eşkere bike, ji AFP’ê re got, “Li ser plana vekişîna çekan ji kampên ku ji salên 1960’î û vir ve li derveyî kontrola dewletê ne lihevkirin hatiye kirin.” Hate ragihandin ku ev plan wê gav bi gav pêk were.
Li gorî rojnameya L’Orient le Jour, plan dê di sê qonaxan de pêk were:
Qonaxa yekemîn: Di nîvê meha Hezîranê de wê kampên weke Burc al-Barajneh, Şatila û Mar Elias ên li Beyrûtê bên valakirin.
Qonaxa duyemîn: Di destpêka Tîrmehê de, ev xebat dê bi kampên Celîl û Beddawî yên li Geliyê Bekaa û Bakurê Lubnanê berdewam bikin.
Qonaxa sêyemîn: Jî wê ev xebat derbasî kampên li başûrê Lubnanê bibe.
Serokê Filistînê Mehmûd Abbas piştî hevdîtina xwe ya bi Serokomarê Lubnanê Joseph Aoun re got, “Serdema çekan a li derveyî desthilatdariya dewletê bi dawî bûye” û destnîşan kir ku divê şert û mercên jiyana penaberên Filistînî yên li Lubnanê bên başkirin. Ji sala 2017’an ve ev yekem serdana fermî ya Abbas bo Lubnanê bû.
Nêzîkî 220,000 penaberên Filistînî li Lubnanê di kampên ku bi giranî li derveyî kontrola dewletê de ne dijîn. Bêçekkirina kampan weke beşek ji stratejiya Lubnanê ji bo bihêzkirina serweriya xwe tê dîtin. Hikûmet ji bo sînordarkirina hêza leşkerî ya Hîzbullahê jî gavan diavêje.
