Kongreya Awarte ya 23’yemîn a KNK’ê bi axaftinên delegeyan, nûnerên partiyên siyasî û beşdarên din berdewam kir.
Nûnerê YNK’ê Arêz Abdullah, nûnerê PJAK’ê Siyamend Muanî, nûnera Platforma Hewreman Jalane Hewreman, nûnerê Rojhilat Komel Adil Îlyasî û nûnerê Suryaniyan Yakup Mirza di kongreyê de axivîn.
Li ser navê Yekîtiya Niştimaniya Kurdistanê (YNK) Arêz Abduulah peyama YNK’ê ya ku ji bo kongreya KNKê ya hatibû şandin xwend. Di peyamê de li ser girîngiya çareserkirina pirsgirêkên li Tirkiye û Bakur rawestiya û daxuyand ku divê di asta siyasî û dîplomatîk de xalên hevpar bên avakirin. Di peyamê de ev tişt hatin parvekirin: “Divê maseya muzakereyan were avakirin û ji bo çareseriyek aştiyane îradeyek xurt were nîşandan.” Di peyamê de hat destnîşankirin ku YNK piştgirî da banga Hikûmeta Herêma Kurdistanê ya ji bo avakirina hikûmeteke hevpar a neteweyî. Di peyamê hate bibîrxistin ku avakirina yekîtiya neteweyî û hevsengiya siyasî ya navxweyî ji bo parastina destketiyên gelê Kurd pir girîng in û wiha berdewam kir: “Di vê pêvajoya dîrokî de, havpariya ji bo parastina maf û statuya gelê Kurd pir girîng e. Destketiyên li her çar parçeyan tenê bi hevpariyeke xurt dikarin werin domandin.”
Li ser navê Rêveberiya Xweser a Bakur û Rojhilatê Sûriyeyê Bedran Çiya axivî û anî ziman ku banga Rêber Apo ya 27’ê Sibatê ne tenê ji bo Bakur, ji bo tevahiya gelê Kurd destpêka serdemeke girîng bû.
Bedran Çiya wiha got, “Eger me li Şamê dest bi muzakereyan kiribe, ev yek ji ber bandora banga Rêber Apo ye. Beşdarbûna gelek hêzên siyasî, rûspiyên civakê û partiyan di civîna neteweyî ya li Qamîşloyê de jî hêza vê bangê nîşan dide.” Bedran Çiya diyar kir ku gelê Kurd di 15 salên dawî de li Rojava têkoşîneke mezin daye, modelek çareseriyê pêşxistiye. Bedran Çiya anî ziman ki pêşengiya jinan di navenda vê pêvajoyê de ye û modelek bi nirxên demokratîk teşe girtiye. Bedran Çiya destnîşan kir ku têkoşîn û destketiyên li Rojava bi fedakariya ciwanên Kurd ên çar parçeyan pêk hatiye û wiha pêde çû: “Rojava bi xwîna ciwanên Kurd ên çar parçeyan gihîştiye vê rojê. Ev destketî ne tenê yên gelên wir in, yên hemû gelê Kurd in.”
Bedran Çiya anî ziman ku modela li Rojava avaniyek demokratîk a ku gel û baweriyên cuda bi hev re dijîn derxistiye holê û destnîşan kir ku ev yek rasterast bi fikir û felsefeya Rêber Apo teşe girtiye.
Çiya axaftina xwe wiha domand: “Têkoşîna me ne tenê ji Kurdan re, ji hemû gelên Sûriyeyê re bûye hêvî. Divê yekîtiya neteweyî ya li Rojava pêşketiye ji bo hemû Kurdan wekî mînak were girtin.” Çiya bi bîr xist ku rola KNK’ê di vir de pir girîng û dîrokî ye û biryarên ku di vê kongreyê de hatine girtin, nîqaşên ku hatine kirin hemû Kurdan eleqedar dike.
Piştre li ser navê Tevgera Jinên Kurd Sultan Oger axivî. Sultan Oger Banga Aştî û Civaka Demokratîk a Rêber Apo nirxand û got ku pêvajoyên siyasî yên ku li ser bingeha vê bangê pêş ketin û guhertinên li Rojhilata Navîn ji bo Kurdan qonaxeke dîrokî ye. Sultan Oger anî ziman ku ji bo parastina destketiyên ku heta niha hatina bidestxistin û misogerkirina statuya gelê Kurd, yekîtî pêwîst e û got, “Divê em vê derfeta dîrokî ji dest nedin. Parastina destketiyên ku li çar parçeyan hatine bidest xistin û bikaranîna derfetên nû bi têkoşîna hevpar û yekîtiya neteweyî pêkan e.”
Sultan Oger destnîşan kir ku gelê Kurd ji her demê bêtir rêxistinkirî û bihêztir e û got ku bi taybetî di warê rêxistinbûna jinan de qonaxek girîng bi dest xistiye. Sultan Oger da zanîn ku di vê pêvajoyê de divê xwedî hem bîranîna şehîdan û hem jî berpirsiyariya dîrokî were derketin û destnîşan kir ku kongreya KNK’ê di vê çarçoveyê de wê roleke dîrokî bilîze.
Serokê Partiya Îslamî ya Kurdistanê Hîkmet Serbilind di kongreyê de axivî û anî ziman ku gelê Kurd bi têkoşînê û dayina bedelên mezin destketiyên mezin bi dest xistiye û bang li hemû partî û rêxistina kir ku ji bo parastina van destketiyan û misogerkirina yekîtiya neteweyî bi hev re tevbigerin.
Delegeyên Başûr, Rojava û Rûsyayê yên KNK’ê ku ji ber pirsgirêkên vîzeyê nekarîn beşdarî kongreyaê bibin, bi rêya telekonferansê beşdarî kongreyê bûn û axaftin kirin.
Kongre bi axaftin, nîqaş û pêşniyarên delege û beşdarên kongreyê berdewam dike.
Kongre wê sibe berdewam bike.
