Dîwana Hevserokatiya KONGRA-GEL bi wesîleya Cejna Qurbanê daxuyaniyeke nivîskî weşand. Berfirehiya daxuyaniyê bi vî rengî ye:
“Em Cejna Qurbanê ya gelê me û alema Îslamî ji kurahiya dilê xwe ve pîroz dikin. Em hêvîdar in ev cejn wê tevkariyê li têgihiştineke baştir a banga Rêber Apo ya ji bo ‘Aştî û Civaka Demokratîk’ ku weke manîfestoya sedsala 21’an tê binavkirin bike û bi taybetî ji aliyê Kurd, Tirk û tevahiya gelên Rojhilata Navîn ve bêhtir were xwedîderketin.
Rêber Apo ev banga dîrokî ji bo pêşî li polîtîkayên dewleta Tirk ên înkar û îmhayê ku li hemberî daxwaza gelê Kurd a maf û hiqûqê dihat kirin bigire û ji zemîna şer û pevçûnê derexe û ji bo şert û mercên têkoşîna demokratîk pêk were kir.
Eniya Sîstema Hikûmeta Serokkomariyê ku Serokkomar Recep Tayyîp Erdogan nûnertiya wê dike, ji bo bersivê bide firsenda mezin a ku ev banga dîrokî bi taybetî ji bo gelên Tirkiyeyê pêşkêş dike, neavêtiye.
Helwesta hêdî ya AKP’ê û bêçalakbûna partiya muxalefeta sereke CHP’ê ya di anîna vê meseleyê ya li Meclîsê, di vê pêvajoya dîrokî de hem dibe sedema îsrafa demê û hem jî rê li ber provokasyonan vedike.
Karên li ser vê pêvajoya dîrokî nabe ku ji siyaseta bi hesab a desthilatdariya hikûmeta AKP’ê re bê hiştin. Hêz û derdorên ku daxwaza aştî, demokrasî û azadiyê dikin, xwediyê eslî yê vê pêvajoyê ne. Ji bo zext li ser partiyên siyasî bê kirin û meclîs bikeve nava liv û tevgerê, divê bi lez zexta raya giştî bê afirandin. Rewşenbîr, derdorên akademîk, saziyên civaka sivîl, sendîka, rojnamevan, rêxistinên jinan, xwendekar ji bo ‘Avakirina Aştî û Civaka Demokratîk’ divê pêşengiyê ji karê afirandina raya giştî re bikin. Ji bo avakirina mejiyê civaka demokratîk û aştiyê ku wê pirsgirêkên civakî hemûyan çareser bike, divê rê û rêbaz bêne afirandin.
Serdanên Cejna Qurbanê ji bo vê yekê firsendeke mezin e. Di serdanên cejnê de divê rojeva bingehîn karên li ser avakirina civaka demokratîk a bang dîrokî ya Rêber Apo be. Divê berê me li pêşvebirina têkoşîna civaka demokratîk be. Di serî de azadiya Rêber Apo pêşketina demokrasî û aştiyê bi vê ve girêdayî ye.
Li ser vê bingehê em Cejna Qurbanê careke din li gelê xwe û Alema Îslamê ji dil û can pîroz dikin û dibêjin, bila cejn bibe wesîleya yekîtî û piştevaniya gelan.”
