Li Amedê kesên di êrîşa DAÎŞ’ê ya li dijî mîtînga “Mirovahiya Mezin” a di 5’ê Hezîrana 2015’an de ji aliyê Partiya Demokratîk a Gelan (HDP) ve hat lidarxistin de şehîd bûn, di salvegera 10’emîn de li Qada Îstasyonê ya ku teqîn lê pêk hatibû, hatin bibîranîn. Parlamenterên Partiya Wekhevî û Demokrasiyê ya Gelan (DEM Partî), nûnerên rêxistinên civaka sivîl, kesên di êrîşê de birîndar bûn, xizmên wan û gelek kes beşdarî bîranînê bûn.
Bîranîna ku wêneyên şehîdên 5’ê Hezîranê hatin hilgirtin de bi deqeyek rêzgirtinê dest pê kir.
‘BERPIRSIYAR WÊ HESAB BIDIN’
Kekê Necatî Kurul ê ku di komkujiyê de jiyana xwe ji dest da, Hayatî Kurul di bîranînê de axivî û got, “Em naxwazin kesên ku ev êş jiyane, careke din heman êşê bijîn. Ew kesên ku komkujî pêk anîne, wê rojekê li ber edaletê hesab bidin.”
Hevseroka DEM Partiyê ya Amedê Gulşen Ozer êşa ku 10 sal berê hatiye jiyîn bi bîr xist û got, “Wê rojê atmosfereke cejnê hebû, lê pergalê tarîtî bi me da jiyîn. 5 kesan jiyana xwe ji dest dan, zêdetirî 400 kes birîndar bûn. Em ê vê komkujiyê ji bîr nekin, em ê nehêlin ku were jibîrkirin. Berpirsiyarên vê bûyerê wê rojekê hesab bidin.”
TÊKOŞÎNA AŞTÎ Û DEMOKRASIYÊ WÊ BIDOME
Parlamentera DEM Partiyê ya Amedê Adalet Kaya jî diyar kir ku wê demê êrîşek li dijî têkoşîna aştî û demokrasiyê hate kirin û wiha domand: “Ev êrîş êrîşek li dijî pêvajoya çareseriyê bû. Yên ku jiyana xwe ji dest dan ji bo aştî û demokrasiyê têkoşiyan. Ew şehîdên aştî û demokrasiyê ne.”
Adalet Kaya anî ziman ku ev komkujî ji bo şikandina îradeya gel pêk anîn û wiha pêde çû: “Ew bi ser neketin. Gelê Amedê tarîtiya DAÎŞ’ê têk bir. Têkoşîna me ya ji bo cezakirina sûcdar û berpirsyarên komkujiyê wê didome.”
Adalet Kaya bal kişand ser banga 27’ê Sibatê ya Rêber Apo û wiha axivî: “Ev bang ji bo aştiyê derfeteke girîng e. Em ê bi xwedîderketina li mîrateya şehîdên xwe aştî û civateke demokratîk ava bikin. Em soza edaletê didin malbatan.” Adalet Kaya axaftina xwe bi gotina “Bijî aştî, bijî civaka demokratîk” bi dawî kir.
Bîranîn bi danîna qurnefîlan li cihê ku bombe lê teqiya, li gel wêneyên kesên jiyana xwe ji dest dane bi dawî bû.
