Herî zêde Dayikên Aştiyê xwedî li banga ‘Aştî û Civaka Demokratîk’ a Rêberê Gelê Kurd Abdullah Ocalan derketin ku di şer de yên herî zêde berdêl dan ew bûn.
Dayikên Aştiyê ku bi hesasiyeteke mezin pêvajoyê dişopînin ji ANF’ê re axivîn. Dayikan anîn ziman ku dora gavavêtinê ya dewletê ye, divê sererastkirinên hiqûqî tavilê bêne kirin û gotin, “Eger aştî wê pêk were, divê tam pêk were. Em dixwazin zarokên xwe hembêz bikin.”
‘CENAZEYÊ BIRAYÊ MIN HÎN JÎ LI KÊLEKA RÊYA GORISTANA KILYOSÊ YE’
Ji Dayikên Aştiyê Rewşan Doner bi bîranîna şehîdên 14’ê Tîrmehê û qurbaniyên Komkujiya Zîlan dest bi axaftina xwe kir. Rewşan Doner anî ziman ku weke malbateke ku şehîd û berdêl daye, ew pêvajoyê bi baldarî dişopînin û ew hewl didin êşa xwe bide aliyekî û aştiyê ava bike.
Rewşa Doner diyar kir ku cenazeyê birayê wê ku ji Goristana Garzanê hate derxistin, hîn jî li kêleka Goristana Kîlyosê ye, weke cenazeyê birayê wê gelek cenaze radestî wan nehatiye kirin û got, “Di sala 1999’an de apê min hate şehîdxistin. Piştî 2 salên din apekî min ê din hate şehîdxistin. Weke malbat me bi dehan gerîla şehîd dan. Gelek ji cenazeyan radestî me nekirin. Tenê sala 2013’an di pêvajoya diyalogê de Goristana Garzanê hilweşandin ku cenazeyê birayê min û bi sedan gerîlayan lê veşartî bûn. Li goristana ku bi dijminane êrîş birin ser cenazeyên 5 şehîdên me birin Goristana Kîlyosê û li kêleka rê veşartin. Wê demê Walîtiya Bedlîsê daxuyanî da û diyar kir ku bi hinceta tespîtkirina nasnameya cenazeyan birin Saziya Tipa Edlî (ATK) lê belê li gel ku me DNA ya xwe dan jî cenazeyê birayê min nedan me. Cenaze hîn jî li kêleka rê ya li Kîlyosê ne.”
‘GAZINA JI KESÊN NAXWAZIN PÊVAJO BIMEŞE: BILA BI AQILANE TEVBIGERIN’
Rewşan Doner ku bandora herî giran a şer lê bû, gazin li wan kesan kir ku naxwazin pêvajoya nû bi rê ve biçe.
Doner ku medya dîjîtal dişopîne got, “Yek ji leşkerên ku çend hefte berê ji ber gaza metanê jiyana xwe ji dest da ji Bedlîsê bû. Birayê wî daxuyanî da û got, ‘Bavê min û ez bi salan e cerdevaniyê dikin. Navê me jî binivîsînin, em ê jî biçin operasyonê’. Ez careke din ji vir ji wan re dibêjim; bila bi aqilane tevbigerin. Bi milyonan Kurd û Tirk li vî welatî ne, bi hezaran Kurdan berdêlên giran dan, gund hatin şewitandin, em koçber bûn, weke dayikên ku kezeb şewitî ye, li gel her tiştî em dibêjin aştî, xwişk û biratî, demokrasî, yekîtî û hevgirtin.”
‘BANGA RÊBERTÎ JI BO ME MIZGÎNÎ YE’
Rewşa Doner diyar kir ku banga Rêberê Gelê Kurd Abdullah Ocalan ji bo dayikan gelekî girîng e û destnîşan kir ku divê her kes xwedî li vê bangê derkeve.
Rewşan Doner anî ziman ku PKK ji ber polîtîkaya înkar û îmhayê ya dewletê ava bû û got, “PKK ji bo em Kurd bibin xweedî gotinê û bi rûmet bijîn, ava bû. Bi saya vê têkoşînê yên ku dixwestin me asîmîle bikin hebûna me nas kirin. Ji sala 1993’an heta bi 2025’an weke gelê Kurd me timî aştî xwest, em li muxatab geriya lê me nedît. Weke dayikan banga 27’ê Sibatê ya Rêbertî li ser serê me ye. Ji ber vê yekê em bi banga aştî û civaka demokratîk re ne. Ji bo me dayikan mizgînî ye, lewma em ê vê mizgîniyê dewam bikin.”
‘YÊN KU ÇEK ŞEWITANDIN DIVIYABÛ BI HEYETÊ RE VEGERIYA BÛNA’
Rewşan Doner bi bîr xist ku PKK’ê bi merasîmeke sembolîk çekên xwe îmha kir û diyar kir ku niha dora gavavêtinê ya dewletê ye.
Rewşan Doner destnîşan kir ku pêvajo divê bi garantiya hiqûqî bê ewlekirin û got, “PKK’ê xwe fesix kiriye, ji bo pêvajoyeke nû ya gelê kurd gava destpêkê avêtiye. Niha ji bo pêvajoyê kar hene ku divê bi rengekî qanûnî bêne kirin. Lewma daxuyaniya ku Serokkomar AKP’ê li kampa Kizilcihamamê kir li gorî pêvajoyê kêm e. Koma Aştî û Demokrasiyê ya ji 30 kesî ku çekên xwe şewitand, diviyabû bi heyetê re vegeriya bûya. Diviyabû Erdogan ev garantî bida. Garantiyên hiqûqî yên pêwîst hîn nehatine dayin. Divê tavilê gav bêne avêtin. Eger dem dema guherîn û veguherînê ye divê dewlet jî biguhere û veguhere. Gerîlayên ku çek danîne divê vegerin gel malbatên xwe û karibin siyasetê bikin. Em weke dayik dixwazin tavilê gav bê avêtin. Em dixwazin ku aştiyeke bi rûmet pêk were. Divê sererastkirin tavilê bêne kirin û her kes karibe bi rengekî xwişk û biratiyê li vê xakê bin. Çawa ku li Çanakkale û Sarikmaşi me li gel hev şer kir û ev xak bi hev re qezenç kir, divê em karibin li ser vê xakê bi xwişk û biratiyê, bi rengekî wekhev bijîn.”
‘ŞIKEFTA CANESÊ BILA BIBE MUZE’
Rewşa Doner destnîşan kir ku Şikefta Canesê ya li Silêmaniyeyê ya ku merasîma xatirxwestina ji çekan lê pêk hat, divê bibe muze û got, “Ji bo azadiyê û pêkanîna aştiyê em hewl didin. Em spasiya Hevseroka Konseya Rêveber a KCK’ê Besê Hozat û Koma Aştî û Civaka Demokratîk a pê re dikin.”
‘YÊN KU HATIN TALANKIRIN, SIRGÛNKIRIN Û ÊŞKENCE LI WAN HATE KIRIN TIMÎ EM BÛN’
Feleknas Karabaş diyar kir ku gundê wan ê li Bedlîsê ji ber ku ji aliyê leşkeran ve hate şewitandin ew neçar man bi malbatî koçî Stenbolê bikin. Feleknas Karabaş ragihand ku li sirgûnê wan gelekî êş ji rêyên girtîgehê kişandin û got, “Me berdêlên mezin dan, gundê me hate şewitandin. Dewletê gelekî êşkence li me kir. Yên ku hatin talankirin, sirgûnkirin, êşkence li wan hate kirin timî em bûn. Dema ku em ber bi Stenbolê hatin sirgûnkirin me gelekî tehde dît. Hevjînê min 7 salan li girtîgehê hate ragirtin. Ji ber êşkenceyê diran û qefesa sînga wî şikestin. Ji Sîlîvrî sirgûnî Îzmîrê hate kirin. Di çûn û hatina girtîgehê de me gelekî zorî kişand. Timî heqaret li me dihate kirin. Li gel vê êşa giran em timî aştî, yekîtî û hevrebûnê dixwazin.”
‘BAWERIYA ME YA BI RÊBERTÎ Û GEL TAM E’
Feleknas Karabaş anî ziman ku baweriya wan a bi Rêberê Gelê Kurd Abdullah Ocalan tam e û got, “Baweriya me ya bi Rêbertî tam e, baweriya me ya bi gelê me re tam e. Eger em dewletê û gelê Kurd bînin beramberî hev, yên ku êşkence dîtin em bûn. Yên ku zilm û êşkence dîtin em bûn, lê li gel vê yekê jî em aştiyê dixwazin, em li benda wan e ku gavekê biavêjin. Heta ku ew êrîşî me nedin ji aliyê me ve wê gavek ber bi şer ve neyê avêtin. Em alîgirê aştiyê ne. Lê belê em dixwazin ev aştî bi rûmet be. Kurd, Tirk xwişk û bira ne û eger Misilman Misilmanan bikuje ev kar nabe.
Ez bi taybetî ji vê derê bang li cerdevanan dikim; we rahiştine wan çekan û hûn xwişk û birayên xwe dikujin. Pereyê ku hûn dixwin heram e, ne heca ew tê qebûlkirin ne jî nimêja we. Axaftina we jî rast nîne.
Di heman demê de ji vê derê bang li cîhanê dikim; aştiyeke bi rûmet wê bi destê me pêk bê. Baweriya me ya bi Rêberê me tam e, baweriya me ya bi gelê me tam e. Me gelekî kişand, em hatin sirgûnkirin êşkence li me hate kirin, em hatin girtin, lê dîsa jî em destê xwe ji bo aştiyê dirêj dikin, em li bendê ne ku dewlet a ku timî bi dijminane nêzî me dibû, êdî destê xwe dirêj bike.”
‘EM DIXWAZIN ZAROKÊN XWE HEMBÊZ BIKIN’
Ji Dayikên Aştiyê Fatma Yilmaz destnîşan kir ku ew dixwazin temenê xwe yê bi têkoşînê derbas bûye bi aştiyeke bi rûmet tacîdar bikin.
Fatma Yilmaz diyar kir ku 12 sal in ew agahiyê ji kurê xwe yê derketiye çiyê wernagire, çavê wê timî li rê ye û got, “12 sal in li çiyê kurekî min heye. Nizanim bê sax e yan na. Min nekarî agahiyekê jê werbigirim. Çavên min timî li rêya wî ye. Bila êdî dayik negirîn, xwîn nerije, zarok nemirin. Heta ku aştî pêk were em ê têkoşîna xwe dewam bikin.
Rêbertî banga xwe kir, ji bo aştiyê gav avêt, her tişt anî ziman, ya ku divê bê kirin nîşan da. Bila dewlet êdî gavekê biavêje û sererastkirinên hiqûqî yên pêwîst bike. Bila dayikên leşker û gerîla bibin yek û di aştiyê de israr bikin. Bila xwîna tê rijandin êdî bisekine, rondikên dayikan bisekinin. Em dixwazin xwe bigihînin zarokên xwe, hembêz bikin. Em naxwazin ku dema hatin bêne girtin. Eger aştî wê pêk were divê tam pêk were. Me gelek rondik barand, êdî bes e. Em bi şev û roj ji bo zarokên xwe digirîn. Em hêvî dikin ku ev şer bi dawî bibe û hemû bi hev re rûnên û aştiyeke bi rûmet pêk bînin.”
