23’yemîn Mihrîcana Çandê ya Munzûrê ku li Dersimê îsal bi şîara ‘’Dersim jiyan e; dest bi xweza, îrade, ziman û baweriya min nede’’ tê lidarxistin, bi panela ku pêşeroja ciwanan û zemîna têkoşînê digire dest, dewam kir.
Li Kolana Hunerê panela bi sernavê “Ciwan pêşeroj, pirsgirêk û pêşniyarên xwe yên çareseriyê nîqaş dike” hate lidarxistin. Tevî gelek ciwan û gel, Parlamentera DEM Partî ya Dersimê Ayten Kordu, nûnerên partiyên siyasî û sivîl tevlî panelê bûn.
Dogancan Saritaş û Ertan Çita moderatoriya panelê kirin. Ciwanên ku di panelê de mafê axaftinê girtin, bal kişandin ser bêkarî û bêewlehiya ku polîtîkayên dewletê yên aboriyê diafirîne.
Axaftvanan îşaret bi zextên ku li zanîngeh, kargeh û kolanan rû bi rû dîmînin kriin û destnîşankirin ku çareserî têkoşîna birêxistinkirî ye.
Di panelê de yek ji mijarên ku pir hate ser ziman polîtîkayên hişbir û çetebûn bû. Beşdaran diyar kirin ku dewlet ji bo asîmîlekirin û bêrêxistinkirina ciwanan çete û hişbirê bi zanebûn bi kar tîne û destnîşankirin ku ev xeterî bi taybet li Stenbolê û erdnîgariya Kurdistanê zêde ye.
Ciwanan bang li malbatan jî kirin û wiha gotin: “Zarokên xwe ji têkoşîna şoreşgerî dûr nekin, radestî çeteyan nekin.”
DERSIM XWEDÎ LI ÎRADEYA XWE DERDIKEVE
Piştî panelê ji Kolana Hunerê heta Parka Mamekî li dijî desteserkirina îradeyê meş hate lidarxistin.
Hevşaredarên Dersimê Birsen Orhan û Cevdet Konak ên erka wan hate desteserkirin, Parlementer Ayten Kordu, çalakvana TJA’yê Ayla Akat Ata û gelek kes tevlî meşê bûn.
Girseya ku pankarta “Em xwedî li ked, kar û pêşeroja xwe derdikevin” hilgirtin û di tevahiya meşê de dirûşmeyên “Qeyûm ji Dersimê bicehime”, “Jin, jiyan, azadî!” hatin berkzirin.
Karkerên şaredariyê diyar kirin ku ji aliyê qeyûmê ve ji kar hatine derxistin û rojên zehmet dijîn û xwestin dawî li pêkanînên qeyûmê bên anîn.
Girse piştî meşê li Parka Mameki li hev civiyan. Mihrîcan piştî van bernameyan bi konserê bi dawî bibe.
