Bangewaziya aştiyê ya Rêber Apo a “Pêvajoya Aştî û Civaka Demokratîk”li Tirkiye û Kurdistanê tê nîqaşkirin. Parlamenterê DEM Partiyê yê Stenbolê Celal Firat derbarê pêvajoyê rewşa Elewiyan de ji ajansa me re axivî. Firat destnîşan kir ku dewleta Tirk bi propagandayên şerê taybet hewl dide Elewiyan ji tevgera Kurdan dûr bixe, lê hewldanên tevgera Kurd ji bo tevlîkirina Elewiyan bi bandor bûne.
Firat got ku Elewî aştî, xwişk û biratiyê di rêza yekem de digirin: “Tevgera Kurd bi zelalî diyar kir ku Elewî li vî welatî pirsgirêkên herî mezin dijîn, wê di vê pêvajoyê de bin û bibe xwedî roleke bingehîn. Van nêzîkatiyan di rakirina nîşaneyên pirsa Elewiyan de pir bi bandor bûn.”
Firat pêşveçûnên pêvajoyê wiha vegot: “Di dawiya sala borî de li meclîsê geşedanên girîng çêbûn. Bangewaziya 27’ê Sibatê, xebatên DEM Partiyê, daxuyaniyên rayedarên hikûmetê û dawî li Silêmaniyê şewitandina çekan ji aliyê komek PKK’yiyan ve di nav civakê de tê nîqaşkirin. Elewî jî hewl didin vê pêvajoyê fêm bikin.”
Firat anî ziman ku kirinên dewleta Tirk ên berê di nav Elewiyan de bêbawerî çêkiriye û wiha domand: “Nîqaş hebûn ku dewlet û AKP wê tenê bi Kurdan re li hev bikin, pirsgirêkên Elewiyan û komên din wê bêne paşguhkirin. Armanc, tevlihevkirina hişêElewiyan bû. DEM Partî û tevgera Kurd bi civînên gel, hevdîtinên bi saziyên Elewiyan re van nîşaneyên pirsê rakirin.”Parşamenter Firat nêzîkatiya tevgera Kurd wiha anî ziman: “Aştiya ku were kirin ne tenê lihevhatineke Tirk-Kurd e, lê avakirina civaka demokratîk e ku hemû kesên li vê welatî dijîn, bi taybetî Elewî, bi awayekî wekhev û azad bijîn. Pirsgirêka Elewiyan pirsgirêka me hemûyan e.”
Firat pêşniyara Serokê MHP’ê Devlet Bahçelî ya “Cîgirê Serokkomarê Kurd û Elewî” nirxand û got: “Ev pêşniyar bi taybetî ji Bahçelî hat pir balkêş bû. Elewî civakeke ku tê redkirin û li qada giştî tê paşguhkirin. Ev pêşniyar naskirina nasnameya Elewiyan e û ji vî alî ve watedar e. Lê ya girîng, pergaleke qanûnî ye ku li ser bingeha hemwelatiya wekhev, her kes bi nasnameya xwe azad be.”
Firat daxwazên Elewiyan wiha rêz kir: “Elewî avakirina civakeke demokratîk, dabînkirina aştiyê, dawîanîna pevçûn û êşan dixwazin. Qanûna bingehîn a tekperest divê bê guhertin, Qanûnek bingehîn a nû ku her kes bi nasnameya xwe azad bijî were çêkirin.”
Li dijî propagandayên hin derdoran ên ku Elewiyan ji pêvajoyê dûr dixin jî ev tişt anî ziman: “Ev xebatên nebaş in û ew tiştekî nû ji Elewiyan re pêşniyar nakin. Em di her derfetê de pêvajoyê rave dikin, nîşaneyên pirsê radikin. Elewî wê di dawiya vê pêvajoyêde yek ji destketiyên herî mezin bin.”
Firat destnîşan kir ku komîsyona li meclîsê divê baweriyê bide gel û Elewî yan ku daxwazên wan yên qanûnên nû yên li ser hemwelatiya wekhev dabîn dikin.
