Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP) û Tevgera Jinên Azad (TJA) di çarçoveya “Hevdîtinên Civaka Demokratîk” de bi şîara “Em aştî û civaka demokratîk ava dikin” li navçeya Qoserê ya Mêrdînê şahiyek li dar xistin.
Beriya şahiyê bi sedan kes ji Qada Azadiyê heta qada Newrozê meşek li dar xistin. Meşvan li qada Newrozê ji aliyê bi deh hezaran kesan ve bi dirûşmeya “Bijî Serok Apo” hatin pêşwazîkirin.
Di tevahiya şahiyê de dirûşmeyên “Bijî Serok Apo”, “Bê Serok hiyan nabe”, “Jin jiyan azadî, azadîya Rebertî” û “Silav ji Îmraliyê re hezar silav” deng vedan.
Pankart û posterên mezin ên Rêber Apo li qadê coşê zêde kir. Pankartên bi nivîsên “Bi hevrêtiya komunalîst ber bi civaka rêxistinkirî ve”, “Bi Rebertîya azad, ber bi civaka aştî û demokratîk ve” û “Jina ciwan hêza esas a komunaliteyê ye” li çar aliyên qadê hatin daleqandin. Dema ku posterên Rêber Apo di nava girseyê de hate gerandin, coş zêde bû.
Li ser navê Komîteya Amadekar Hevserokê DEM Partî yê navçeyê Halît Karahan beşdaran silav kir. Piştre Hevserokê DEM Partî yê Mêrdînê Nîhat Gokalp wiha got, “Yên ku dibêjin gelê Kurd, gelê Qoserê qediya bila berê xwe bidin vê qadê. Ev qad ji bo ku Birêz Ocalan êdî di nava gel de be, diqîre. Deriyên Îmraliyê vekin.”
Parlamentera DEM Partiyê Bêrîtan Guneş jî wiha got, “Êdî kes nikare bibêje Kurd nînin. Kurd li vir in û wê her tim li vir bin. Divê dewletê gavê biavêje, Birêz Ocalan divê êdî azad bibe.”
Piştî axaftinan hunermend Yilmaz Cizîrî û Hamît Karadenîz derketin ser dîkê. Şahî bi stran û govendê heta derengiya şevê dewam kir.
