Pêvajoa ku bi ‘Banga Aştî û Civaka Demokratîk’ a Rêber Apo destpê kir, bi karên ‘Komîsyona Demokrasî, Xwişk-Biratî û Piştevaniya Mîllî’ ya li Meclîsê dewam dike.
DEM Partiyê beriya bi çend rojan lîsteyek ji rojnamevan, hiqûqnas, rêxistinên civakî yên sivîl, xizmên windayan û malbatên qurbaniyên şer pêşkêşî komîsyonê kir, ji bo li wan bê guhdarîkirin.
Di lîsteyê de hevjîna parlamenterê DEP’ê Mehmet Sîncar, Cîhan Sîncar jî heye ku Mehmet Sîncar 4’ê Îlona 1993’an li Êlihê li naverastê hate qetilkirin.
Dosya Mehmet Sîncar ku li gel Rêveberê DEP’ê yê bajarê Êlihê Metîn Ozdemîr hate qetilkirin, ji demê re hate hiştin, piştî ku 32 sal di ser re derbas bû li ber dembihurînê ket û kiryarê bûyerê endamê Hîzbûllahê Cîhan Yildiz jî piştî 11 salên girtîhiştinê hate berdan.
Cîhan Sîncar got, pêvajoya ku hatiye destpêkirin dilê gelê Kurd ê ku têkoşîna aştî û demokrasiyê dimeşîne xwweş kiriye û destnîşan kir ku gavên bi lez û şênber ên di vê pêvajoyê de bêne avêtin wê bibin cihê baweriyê.
Cîhan Sîncar işaret bi girîngiya gavên ji dil û durust kir û got, “Divê dewlet ji vî gelî lêborînê bixwaze ku êşên giran mezin kişand û berdêlên giran da.”
‘GAVÊN ŞÊNBER WÊ BAWERIYA GEL A BI PÊVAJOYÊ ZÊDE BIKE’
Cîhan Sîncar bi bîr xist ku Mehmet Sîncar û hevalên wî ji bo çareseriya pirsgirêka Kurd salên dûr û dirêj ked dan, lê belê wê demê li helwesteke gelekî tund a dewletê rast hatin û berdêla vê helwestê jî kuştina mirovan bû.
Sîncar ragihand ku weke malbatê ew ji vê pêvajoya piştî bi salan destpê kir kêfxweş in û bi vî rengî dewam kir, “Em hêvî dikin ku ev pêvajo wê bi rengekî baş bi encam bibe. Li gorî pêwîstiyên demê divê em pirsgirêkan bi rêya diyalog û danûstandinan binirxînin, li ser biaxivin. Gelê Kurd li ser xaka xwe berdêlên gelekî cidî û giran da. Em jî dixwazin pirsgirêkan bi rêya demokrasî û diyalogê çareser bikin.”
Cîhan Sîncar komîsyona ku ava bûye girîng dît û anî ziman ku ew ê bi zimanê xwe yê dayikê, çand û nêrînên xwe li vê komîsyonê biaxive.
‘EV GEL DAXWAZA AŞTIYEKE BI RÛMET DIKE’
Sîncar diyar kir ku gelê Kurd berdêlên giran daye û di vê pêvajoyê de daxwaza avêtina gavên ji dil û bi lez dike.
Cîhan Sîncar got, “Em aştiyeke bi rûmet a serbilind dixwazin. Piştî dayina ewqas berdêlan em aştiyeke binpêkirî naxwazin’ û bi bîr xist ku bi hezaran mirov girtî ne, bi hezaran li sirgûnê ne, ji ber ku gotin ‘Em Kurd in’ di vê rewşê de ne. Lewma daxwaza berdana girtiyên nexweş kir.
‘DIVÊ HESABÊ KOMKUJIYÊN BERÊ BÊNE DAYIN’
Cîhan Sîncar destnîşan kir ku Mehmet Sîncar ji bo rawestandina xwînê çûbû Êlihê, lê wê demê dewletê wezîfeya xwe nekir û got, “Yên ku ew qetil kirin, bê ceza hatin hiştin. Kujer 32 salan nehatin darizandin. Kujerên Mehmet Sîncar, Apê Mûsa, Vedat Aydin û bi sedan lehengên din, divê bêne darizandin û hesab bidin.”
‘PÊVAJO DIVÊ BI LEZ BÊ MEŞANDIN’
Cîhan Sîncar destnîşan kir ku dewlet ji ber komkujiyên hatin kirin divê lêborînê ji gel bixwaze û got, “Yên ku anîn serê vî gelî tiştên sivik nînin. Ji ber êşkence û windahiyên ku anîn serê vî gelî divê lêborînê bixwazin. Divê ji ber şehîdên demokrasiyê lêborînê bixwazin. Lewma pêvajo divê bi lez bê meşandin. Em dixwazin ev pirsgirêk bê çareserkirin. Ji ber ku yên ku êş kişandine bi êşê zanin. Ev berdêlên giran divê bi aştî û çareseriyê bi encam bibe. Di vê pêvajoyê de em ê jî ya ji destê me bê, bikin.”
‘YÊN KU ÇÛN, TÊKOŞÎN JI ME RE WEKE MÎRATE HIŞTIN’
Cîhan Sîncar diayr kir ku wê têkoşînê dewam bikin, bi gel re li ber xwe bidin, têkoşîna li dijî neheqiyê bidomînin û got, “Em ê mîrateya têkoşînê li erdê nehêlin. Divê em daxwazên ên çûne bi cih bînin. Mehmet Sîncar û yên weke wî rûmeta me ne. Em ê ji bo wan û têkoşîna demokrasiyê her tim biaxivin.”
‘EV PÊVAJO WÊ BI SER BIKEVE’
Herî dawî jî Cîhan Sîncar bang li piştevanên têkoşîna demokrasiyê kir ku piştgiriyê bidin vê pêvajoyê û got, “Çi dibe bila bibe divê em bi têkoşînê aştiyê ava bikin. Daxwaza me gelekî mezin nîne; çi yê Tirkan hebe em dixwazin heman tişt ji bo Kurdan jî hebe. Em dixwazin bi rengekî wekhev û azad li ser xaka xwe bin.”
