Seroka Yekîtiya Jinên Suriyan li Sûriyeyê Corcêt Barsom li ser rewşa Sûriyeyê ji ANF’ê re axivî û wiha dest bi axaftina xwe kir, “Di roja me ya îro de û ev demeke dirêj e Sûrî di rewşek e pir aloz de ye. Bi salan e ku li Sûrî hilweşandinek di asta sazî, civak û jiyanê de heye. Ev bi demê re xirabtir bû û me dît ku çawa di encama vê rewşê de li gelek herêman kiryar û bûyerên cûr be cûr rû dan. Herî dawî jî li Suwêdayê bû. Bûyerên ku îro li bajarê Suwêdayê rû didin di encama ne edaletî û dûrxistina gel ji biryaran û piştguhkirina civakê ye. Serhildana gelê Suwêdayê qîrîna daxwaza jiyanek bi rûmet û wekhev e. Li aliyekî din lawaztiya hikumeta heyî di çareserkirina pirsgirêkan de xwe dide xuyakirin. Bi taybetî li Sûriyeyê ku tê de dewlemendiyeke netewe û pêkhateyan heye, lê ewlehiya van pêkhateyan pêk nayê. Ev pêkhate rojane bi tirsa qetilkirin û qirkirinê ne. Ji ber wê îro Sûrî di rewşeke xetere de ye û bêdengiya li ser van kiryarên ku li ser civakan di Sûrî de tên kirin weke Durzî, Suryan û Elewiyan û hwd. Ev rewş ber bi teqînek mezintir ve diçe.”
Corcêt di dewama axaftina xwe de diyar kir ku Hikumeta Şamê ya veguhêz hişmendiya dûrxistin ango tunekirinê ferz dike û got, “Weke ku tê zanîn li Sûriyeyê hişmendiyek yek alî û yek reng tê ferzkirin. Hikumeta Şamê a Veguhêz a ku diviyabû bi sîstemeke demokratîk nêz bibûya, ev yek nekir û li şûna ku sîstemeke pir rengî û wekhev bi pêş bixe, vê carê jî hişmendiya ku çûyî dubare ferz dike. Bi taybetî li hember pêkhateyên li Sûrî xîtaba hikumeta Şamê a veguhêz li ser esasê Îslama hişk tê kirin. Ev jî ji bo pêkhateyên din xeterî ye. Bi taybetî her kesî dît ku rewşa li herêmên ku di bin serweriya komên girêdayî hikumetê de bi çi awayî bûn, kiryarên li ser hemû pêkhateyan hebû û bi taybet li dijî jinê. Li vir nesekinî, di asta binpêkirina xisûsiyetên wan pêkhateyan de kiryar hatin pêkanîn.”
Di nav axaftina xwe de Corcêt qala rewşa jinê û kiryarên li dijî jinên li Suwêdayê kir û got, “Li gelek bajar û herêmên Sûrî jin rojane rastî kiryar û êrîşan û qetilkirinê tê, lê li Suwêdayê ev yek bi awayekî pir li pêş li ber çava tê kirin. Jinên Suwêdayê jî ji vê zulmê bê par neman, bi derketina bûyerên li Suwêdayê û despêkirina serhildanên gel re, komên girêdayî Hikumeta Veguhêz yekemîn jin kirin hedef. Her wiha ji destpêka şoreşê ve bêyî ku berê armancên şoreşê biguherin jinên Suwêdayê di serhildanên gel û çalakiyên ku li dijî rejîma Baas çêdibûn de di nava de cihê xwe digirtin û rastî êrîş û tehdîdan hatin. Lê îro di eger em li bûyerên ku çêdibin mêze bikin, em ê bibînin ku jin ji her alî tê tunekirin, maf, hebûn, nêrîn û xisûsiyeta jinê tê binpêkirin û dixwazin jinê ber bi hişmendiyekê hişk û yek alî ve bibe.”
Corcêt anî ziman ku eger mudexeleyek ji bo rewşa Suwêdayê çênebe wê jin bi xeteriyên mezin re rû bi rû bimîne û pê de çû, “Eger ev rewş bi vî awayî dewam bike û çareseriyek neyê dîtin wê jin bi xeteriyên mezin re rû bi rû bimîne. Xeteriya herî mezin jî tunekirina rol û hebûna jinê û meşandina şidetê li dijî jinê ye. Ev yek bandorê li jinê tenê nake, bandora wê li ser hemû civakê çêbibe. Lê ev xeterî li bajarê Suwêdayê tenê namîne, li ku derê wekhevî, ewlehî, rol û hebûna jinê nayê parastin li wir ev xeterî herî zêde li pêş dikevin. Wekî ku tê dîtin jî di sîstema hikumeta Sûrî a veguhêz de ev dûrxistina jinê ji cihên biryar û nêrînan her tê kirin, ev jî xeteriyeke mezin e.”
Di nav axaftina xwe de Corcêt bal kişand li ser projeya Rêveberiya Xweser a li herêmên Bakur û Rojhilatê Sûriyeyê û got, “Projeya Rêveberiya Xweser a li herêmên Bakur û Rojhilatê Sûriyeyê ku di demê ku her der di rewşeke aloz re derbas dibe û xeterî li her derê heye, lê projeya Rêveberiya Xweser di nav xwe de ewlehî, nenavendî û demokratîkbûn derxist holê. Di sîstema Rêveberiya Xweser de nimûneya hevkariya jinê ango wekheviyê û hebûna hemû pêkhateyan pir li pêş e. Her wiha pirrengiyê û pêkhateyên heyî weke hêz dibînin. Projeya Rêveberiya Xweser bi xwe re tecrubeyên nû anîn, weke komîn û meclîsan berevajî hişmendiya hikumeta Şamê ya Veguhêz e. Ji ber wê em dikarin bêjin ku projeya Rêveberiya Xweser dikare bibe çareserî ji bo hemû pirsgirêkên Sûriyeyê. Her wiha divê bi diyalogeke Sûrî rast ev proje were pêşkêşkirin û di erdnîgariyekê de sînordar nebe. Divê ev perensîbên wê, weke nenavendî, edalet û wekheviyê û parastina mafê jinê di nav destûreke Sûrî ya nû de were bicihkirin. Tenê bi vê gavê wê Sûrî ber bi aştiyê û wekheviyê ve biçe û ew ê her welatiyek Sûrî xwe di nav destûr de bibîne û erkê xwe li hember welatê xwe pêk bîne.”
Di dawiya axaftina xwe de Seroka Yekîtiya Jinên Sûryan a Sûriyeyê Corcêt Barsom got, “Îro li Bakur û Rojhilatê Sûriyeyê tecrûbeyeke rast heye. Li hember her cûre êrîş û tundiyê li ber xwe da û heta roja îro hat. Bi taybetî bi tecrubeya jinê li Bakur û Rojhilatê Sûriyeyê ku jinê tê de pêşengtî kirin û roleke mezin rakirin ser milê xwe. Ev tecrûbe îro ji Bakur û Rojhilatê Sûrî deng vedaye cîhanê. Ji bo wê divê tecrûbeya Rêveberiya Xweser rast were dîtin û belavkirina vê tecrûbeyê li Sûriyeyê wê wekhevî, demokrasî û jiyanek bi rûmet pêkan be.”
