Endamên DEM Partiyê yên komîsyonê Gulistan Kiliç Koçyîgît, Meral Daniş Beştaş, Hakki Sarûhan Olûç, Celal Firat û Cengîz Çîçek li ser du civînên dawî yên 19 û 20’ê Tebaxê yên komîsyonê daxuyanî dan.
Di daxuyaniyê de hate ragihandin ku li wan kes û saziyan hate guhdarîkirin ku bi mutabqata partiyên siyasî yên di komîsyonê de têne temsîlkirin, hatin diyarkirin.
Endamên DEM Partiyê yên komîsyonê gotin, “Beriya her tiştî em spasiya kes, derdor û saziyan dikin ku êşên hatine kişandin û mexdûriyet bi rengekî eşkere parve kirin, rexne, nêrîn û pêşniyarên xwe kirin.
Di axaftinan de wêneyekî bandora aborî, siyasî û civakî ya zemîna şer a meseleya Kurd hate nîşandan. Her çîrokek, her bûyereke ku qewimî, her tespît û pêşniyara hate kirin, parçeyên ji vî wêneyî bûn.”
Di daxuyaniyê de hate ragihandin ku nêrîn û pêşniyar ji hev cuda jî bin, piştgiriya kes û saziyên ku wan guh dan wan, wezîfeyeke dîrokî dide saziya siyasetê.
Di daxuyaniyê de hate gotin, “Pêşkêşkiyên ku me di nava du rojên dawî de li wan guhdarî kir, giraniya barê rabirdûyê careke din li bîra me xist. Em bi giraniya vî barî zanin û ji bo ev bar ji nişfên bê re nemîne, çi ji destê me bê em ê bikin, em ê di karên komîsyonê de vê biryardariya xwe nîşan bidin.”
Di dawiya daxuyaniyê de sekna bi biryar a li hemberî provokasyonên gengaz ên li hemberî karên komîsyonê hate destnîşankirin.
