Şervanê QSD’ê Mihemed Mutai El Hîsanî ku 19’ê Tebaxê li ser erka xwe şehîd bûbû, îro bi merasîmeke biheybet li Pakrewangeha Şehîdan a li devera Hikumiyê ya bakurê Reqayê hat oxirkirin.
Bi sedan şêniyên kantona Reqayê, endamên saziyên sivîl, meclisên leşkerî û partiyên siyasî beşdarî merasîmê bûn.
Merasîmê bi rêzgirtinê dest pê kir. Piştre endama Meclisa Malbatên Şehîdan a Reqayê Îtab El Dêf axivî. Îtabê sersaxî ji malbata şehîd re xwest û got: “Di demekê de ku arîşe zêde dibin, lehengên rasteqîn derdikevin ku ne bi gotinan, lê bi xwîna xwe ya pak dîrokê dinivîsin. Şehîd Mihemed El Hîsanî jî yek ji wan lehengan e di wê baweriyê de bû ku bêyî berdêlan welat nayê parastin û bêyî bawerî û israrê keramet nayê bi dest xistin. Dilovaniya xwedê li şehîdên me yên leheng be û cihên wan bihûşt be.”
Ji fermandarên QSD’ê Halim Ebdî jî diyar kir ku şehîdên Bakur û Rojhilatê Sûriyeyê xaka xwe parast û şehîd Mihemed di çeperên şer de bi wan re bû. Ebdî bi domdarî got: “Şehîd Mihemed heya şehadeta xwe welatê xwe parast. Mihemed şehîd bû, lê mîna wî li nava hêzên me pir ni. Bi navê QSD’ê em dibêjin bila serê malbata şehîdê me Mihemed sax be, wê xwîna şehîdan vala neçe.”
Piştî axaftinan nasnameya şehîd hat xwendin û radestî malbata wî hat kirin. Di dawiyê de cenazeyê şehîd bi dirûşmên “Bi can bi xwîn em bi te re şehîd” hat definkirin.
