Komîteya Bilind a Piştgirî û Alîkariya bi Mirovên Koçberbûyî ya Wezareta Koç û Koçberan a Iraqê 20’ê Tebaxê li ser rewşa koçberên li Iraqê civînek lidar xist.
Wezaretê li ser encama vê civînê daxuyaniyek da û li ser malpera xwe ya înternetê parve kir.
Li gorî vê daxuyaniyê, di civînê de amadekariyên ji bo girtina dosya koçberan heta dawiya sala 2025’an hate nirxandin.
Hate ragihandin ku di vê çarçoveyê de malbatên li kampan dimînin weke mirovên ku bi civakê re bûne yek û entegre bûye hatiye nirxandin.
Bi dewamî hate destnîşankirin ku ji bo girtina dosya koçberiyê, tê xwestin ku ji van malbatan re alîkarî bê dayin ku li cihê lê ne bi cih bibin.
Mijarên di civînê de hatin nirxandin, li Şengalê bû cihê tirs û fikaran ku koçberiya Şengaliyan a ji neçarî mayinde bikin.
Li gorî daneyên fermî yên heman wezaretê, li Herêma Kurdistanê bi taybetî jî li qadên di bin kontrola PDK’ê de ne 22 kampên koçberan hene û zêdeyî 150 hezar Êzidî lê dimînin.
Piraniya van Êzidiyan jî ji Şengalê ne ku di dema fermanê de ji neçarî koçber bûne û gelek ji wan jî dixwazin ku derfet ji wan re bê dayin ku vegerin Şengalê û li warê xwe bi cih bibin, warê xwe ava bikin.
Lê belê bi plana ku wezaretê di civîna xwe de nîqaş kir, fikar hene ku Şengaliyên li kampan li wan herêman bêne hiştin û bi vî rengî Şengal ji şêniyên xwe yên resen bêpar bê hiştin.
Ev yek jî weke gefek li ser demografiya Şengalê tê şîrovekirin.
