Ayşegul Dogan li navenda giştî ya partiya xwe di civîna çapemeniyê de li ser pêvajoya aştî û civaka demokratîk peyamên girîng da.
Ayşegul Dogan anî ziman ku Tirkiye ji sala 1993’an û vir ve li aştiyê digere û işaret bi rola Rêber Apo ya di vê pêvajoyê de kir.
Ayşegul Dogan got, “Em pêşî li tevlîbûna li siyaseta demokratîk vekin. Eger divê bi Birêz Ocalan re hevdîtin bê kirin hingî em hevdîtinê pê re bikin û pêşniyarên wî werbigirin. Helwesta bi israr a Ocalan a ji bo aştiyê pêvajo bi pêş ve bir. Banga 27’ê Sibatê, peyama bi dîmen a 9’ê Tîrmehê û bersiva 11’ê Tîrmehê ya li vê bangê, bandora vê lîderiyê ye.”
Berdevka DEM Partiyê helwesta têkildarî axaftina bi Kurdî ya li civîna dawî ya komîsyonê rexne kir û got, “Ev yek divê ji aliyê hiqûqî ve bê destekkirin. Em li bendê bûn ku ev komîsyon doh helwesteke giran û têgihiştî nîşan bida. Di rewşeke bi vî rengî de dibe ku em îro qala tiştên gelekî cudatir bikira. Nezahat Teke ku xwest bi zimanê xwe yê dayikê biaxive, dikarîbû derfetên axaftina bi zimanê dayikê jê re bihata dayin. Mesele bi xwe doh li wê derê xwe nîşan da.”
Ayşegul Dogan bal kişand ser mijara hevdîtina bi Rêber Apo re û got, “Birêz Ocalan lîdereke ku vê pêvajoyê bi lez dimeşîne. Ji bo bidawîkirina şer û mayindekirina aştiyê divê komîsyon li Ocalan guhdarî bike. Rast nîne ku ev yek tenê weke daxwaza DEM Partiyê bê dîtin. Em qala çareseriya pirsgirêkeke 100 salî dikin. Divê gavên bi wêrekî bêne avêtin.”
Ayşegul Dogan destnîşan kir ku divê ew xwe ji nîqaşkirina rêbaza hevdîtina bi Rêber Apo re nedin aliyekî.
Ayşegul Dogan her wiha diyar kir ku wê bi navê “Ez aştiyê dixwazim, ji ber ku…” kampanyayeke nû bidin destpêkirin.
