Dilşah Ozgen, diyar kir ku tevî bi salan ew têdikoşe aştî nedîtiye û got ku divê ewil dev ji gotina ‘terorê’ bê berdan. Dilşah Ozgen got, “Li her devera vî warî xwîna ciwanên Kurd heye. Ev xwîn ne tenê ji bo axaftinekê, ji bo mafekî hatiye rijandin.”
Dilşah Ozgen a 92 salî, ku nêzîkî 30 salan e ji bo aştiyê têdikoşe, tevî hemû windahiyên xwe jî daxwaza aştiyê dike. Serpêhatiya Dilşah Ozgen mîna serpêhatiya bi hezaran dayikên Kurd ên li Kurdistanê dijîn. Dilşah Ozgen, ku ji ber temenê xwe zehmetiyan dikişîne ku bimeşe û biaxive, gelek caran hatiye binçavkirin û darizandin. Li dadgeha îstînafê cezaya şeş ku lê hatiye birîn heye.
Dilşah Ozgen ji ANF’ê re axivî û diyar kir ku çi mafê wan hebe divê yên Kurdan jî hebin û got, “Ji bilî vê kî dikare bibêje ‘aştî’ pêk hatiye. Gelê Kurd bi salan e berdêl didin. Bila aştî pêk were, bila maf û dewleta gelê Kurd jî hebe. Bila meclîs û qadên me hebin. Ev qas ciwan û mirov bedel dan, ne ji bo gotineke vala ya ‘aştiyê’ bû.”
NIHA DORA DEWLETÊ YE DIVÊ GAV BAVÊJE
Dilşah Ozgen, diyar kir ku aştî ne tenê bi gotinan, di heman demê de bi pêkanîna daxwazên gelê Kurd jî mimkun dibe û got, “Ciwanan çekên xwe danîn, niha dora dewletê ye.” Dilşah Ozgen, bal kişand ser êşa mezin a ku gel dikişîne û diyar kir ku divê ew kesên ku bedel dane, heqê xwe bistînin.
TEVÎ HER TIŞTÎ ME GOT ‘AŞTÎ’
Dilşah Ozgen, da zanîn ku gundê wê hatiye şewitandin, du zarokên xwe winda kirine û got ku hîna jî gora hevserê xwe yê ku hatibû qetilkirin nedîtiye. Dilşah Ozgen got, “Ev tam ew tişt e ku em jê re dibêjin maf. Pêşî divê ew bi me re rûbirû bibin û lêborînê bixwazin, dû re hemû mafên me vegerînin. Em hemû aştiyê dixwazin, lê pêşî divê ew mafên me bidin me.”
DIVÊ DEV JI GOTINA ‘TERORÊ’ BÊ BERDAN
Dilşah Ozgen, her wiha rexne li nêzîkatiya dewletê ya ji bo aştiyê kir û got, “Divê ew dev ji gotinên ‘terorê’ berdin. Divê gelê Kurd jî xwedî hikûmetek û mafê jiyanek wekhev be. Wekî din, aştî çênabe. Divê gavên jidil werin avêtin. Xwîna ciwanan li her devera van waran heye û ev xwîn ji bo mafan hatiye rijandin.”
TEHEMÛLA WAN LI HEMBER GORAN JÎ TUNE YE
Dilşah Ozgen, bal kişand ser rewşa xwe ya wekî “dayika aştiyê” û got ku ji ber axaftina xwe ya ji bo aştiyê hatiye girtin, heqaret lê hatiye kirin û cezayê girtîgehê lê hatiye birîn. Dilşah Ozgen, êrîşên li ser gorên zarokên xwe bi bîr xist û got, “Gorên me hatin bombebarankirin, kevirên wan hatin şikandin. Me têkoşîn meşand da ku ev yek çênebe. Em rastî zilmê hatin, lê armanca têkoşîna me ew e ku hûn û nifşên siberojê aştiyê bibînin.”
WÊ DU KUR Û HEVSERÊ XWE WINDA KIR
Dilşah Ozgen, dayika şeş zarokan ku gundê wê yê li navçeya Pasûrê di salên 1990’î de hate şewitandin, windahiyên mezin jiyan. Kurê wê, Mefair Ozgen ê PKK’yî, di sala 1992’yan de li Stenbolê bi birîndarî ji aliyê polîsan ve hate girtin. Ozgen yê ku bêyî anesteziyê hatibû emeliyatkirin, piştî sê mehan jiyana xwe ji dest da. Hevserê wê, Fîkrî Ozgen, di sala 1997’an de dema ku ji serdana kurê xwe yê girtî vedigeriya, li Amedê di kuştinek nediyar de winda bû. DMME’yê di vê dozê de Tirkiyeyê mehkûm kir ku tazmînatê bide. Kurê wê yê din Ferdî Ozgen, di sala 1999’an de li Sasonê di encama pevçûnê de şehîd bû.
Goristana ku kurên Dilşah Ozgen li Licê lê hatibû veşartin, di operasyonek di sala 2016’an de bi teqemeniyan hate wêrankirin.
