Bi boneya yekemîn salvegera şehadeta rojnamevan Gulistan Tara û Hêro Behadîn, li navenda Kompanya Çetir merasîmek hate lidarxistin. Merasîma bîranînê bi deqeyek rêzgirtina ji bo şehîdan dest pê kir.
Di merasîmê de peyama Dezgeha Çap û Ragihandinê ya Çetir hate xwendin.
Peyama Kompanya Çetir wiha ye:
“Rojnamevan wijdanê civakê û ronakbîrê rastiyê ye.
Salek beriya niha wek rojek îro, saet di 10:00’an de her du hevalên me yên rojnamevan Hêro Behadîn û Gulistan Tara, bi destê dewleta Tirk hatin şehîdxistin. Heta niha, hikûmeta Herêma Kurdistanê li dijî vê sûcî helwestek tund nîşan nedaye û ne amadeye ku wek qurbaniyên êrîşa Tirkiye nas bike.
Li Kurdistanê, rojnamevan û çapemeniyê ji bo ku rûyê rast ê dagirkeran û hevalbendên wan eşkere bikin pencere vekirine. Wan desthilata ku hewl dide bi rêya ragihandina şerê taybet civakê bixapîne, derewîn derxistin.
Îro li ser asta cîhan û navxweyî, da ku rastiyê veşêrin û berovajî bikin rojnamevan têne hedefgirtin. Sala borî li gel her du hevalên rojnamevanên jin, her wiha rojnamevan Cîhan Bîlgîn, Nazim Daştan, Murad Mîrza û Azîz Koyluoglu hatin hedef girtin û şehîd xistin. Li gel şer û pevçûnên herêmî û Rojhilata Navîn, li gelek cihên din ên wek Xezayê bi dehan rojnamevan bûne hedef.
Sînordarkirina azadiya rojnamevanan û şêwedayîna erkê kesayeta rojnamevaniyê heta roja îro jî berdewam dike. Heta biryara dadgehê ya dirêjkirina cezayê Şêrwan Şêrwanî bi çar salan ji aliyê vê desthilatdariyê ve bi zelalî ji me re dibêje; rewşa rojnamevanî û rojnamevanan li Herêma Kurdistanê çiqas di bin metirsiyê de ye. Hikûmeta Herêmê di nava 34 salên desthilata xwe de, nekariye bibe cihek aram ji bo rojnamevaniyê, her ku diçe xirabtir dibe.
Beramberî ragihandina azad, ragihandina şerê taybet pêş dixin ku ji hêla saziyên biyanî, dewlet û hêzên navxweyî ve tê rêvebirin. Bi vê yekê rastiya civakê şaş nîşan dide û vedişêre. Ji ber vê yekê, di rewşek wiha de, israrkirina li ser rastiya civakê erkek exlaqî ye û bingeha afirandina civakek azade.
Di yekemîn salvegera şehadeta her du rojnamevanan Hêro Behadîn û Gulistan Tara de, me rêya azadî û derxistina heqîqetê domand û hewl da ku bibin platformek ji bo deng û rastiya azad a civakê. Emê mîrateya şehîdên ku heta nefesa xwe ya dawî ji bo rastî û azadiyê pêşengtî kirîn, hilgirin.
Em li vir li ber giyanê wan sonda xwe ji nû de dubare dikin ku em ê rê û şopa wan bidomînin, her wiha ji bo derxistin û eşkerekirina edalet û destên tarî yên li pişt şehîdxistina wan, israr bikin.
Wek dezgeha Çap û Ragihandinê ya Çetir, emê bi dirûşmeya ‘Em bibin deng û rengê rastiyê’ xebata xwe bidomînin û bibin şopdarê rêya rêheval Gulistan Tara, Hêro Behadîn û şehîdên ragihandina azad.
Şehîd ronahiya rêya me ne
Jin, Jiyan, Azadî”
