Tevgera Fîlîstînî roja yekşemê daxuyanî da û got, “Me bi rêya navbeynkaran ji bo agirbestê hin fikir ji Emerîkiyan girt.”
Di daxuyaniyê ev tişt jî hate gotin: “Hamas amade ye demildest were maseya muzakereyê.”
JI TRUMP HIŞYARIYA DAWÎ
Ev daxuyanî piştî peyama “hişyariya dawî” ya Serokê DYE’yê Donald Trump a ji bo Hamasê, hate dayîn. Trump ji bo berdana dîlgirtiyên Îsraîlî yên li Xezeyê, bang li Hamasê kir û got, “Îsraîliyan şert û mercên min qebûl kir. Niha divê Hamas jî qebûl bike. Yan di rewşek berevajî de dê encamên vê hebin. Ev hişyariya min a dawî ye, cuda nabe.”
PÊŞNIYARÊN NÛ YÊN DYE’YÊ
Li gorî malpera nûçeyan a Axios nûnerê taybet ê Trump Steve Witkoff hefteya borî bi navbeynkariya aktîvîstekî aştiyê yê Îsraîlî pêşniyarek nû gihand Hamasê. Pêşniyar derbarê dîlgirtiyan peymaneke berfireh û agirbestê digire nav xwe.
Hamas li ser pêşniyara DYE’yê ragihand ku ji bo nîqaşkirina van daxwazan, ew ji bo muzakereyê amade ye:
– Berdana hemû dîlgirtiyan,
– Têkildarî bidawîbûna şer deklarasyonek vekirî,
– Îsraîl bi temamî ji Xezeyê vekişe,
– Ji bo rêveberiya Xezeyê avakirina komîteyeke ji Fîlîstîniyên serbixwe.
BERTEKA MALBATÊN DÎLGIRTIYAN
Li Îsraîlê Foruma Malbatên Dîlgirtiyan daxuyaniya Hamasê weke “pêşketineke rast” pênase kir. Li gorî artêşa Îsraîlê ji 251 kesên di 7’ê Cotmehê de hatine revandin, 47 kes hîna li Xezeyê tên ragirtin. Tê texmînkirin ku ji vane 27 kes mirine.
ROJA YEKŞEMÊ HERÎ KÊM 48 KES MIRIN
Li Xezeyê êrîşên hewayî yên Îsraîlê didomin, di bombebarana dawî de avahiya apartmanekê hilweşiya.
Li gorî Teşkîlata Parastinê ya Sivîl, roja yekşemê li Xezeyê di êrîşên hewayî yên Îsraîlê de 48 kes mirin.
