Volker Turk di 60’emîn rûniştina Konseya Mafên Mirovan a NY’ê de axivî, ‘’gotinên têkildarî komkujiyê’’ yên ji aliyê rayedarên payebilind ên Îsraîlê ve tên bilêvkirin, şermezar kirin û bang li civaka navneteweyî kir ku pêşiya komkujiê bigirin.
Volker Turk got: ‘’Bi awayekî eşkere bilêvkirina gotinên têkildarî komkujiyê ya ji aliyê rayedarên payelind ên Îsraîlê ve û biçûkxistina Filistiniyan ya ku mirov jê şerm dike, min matmayî dikin.’’
Turk bertekên xwe nîşanî civaka navneteweyî da ku li erka xwe ranabe û bang kir ku ji bo pêşîlêgirtina komkujiyê divê tavilê dest bi liv û tevgerê bike.
Volker Turk piştre got: ‘’Em li hemberî gelê Xezeyê erkê xwe bi cih naînin. Pêngavên bibiryar ên têkildarî pêşîlêgirtina komkujiyê li ku ne? Welat, çima ji bo pêşîlêgirtina zulmê hewl nadin? Herêm aşitiyê dixwaze. Xeze bûye goristanek.’’
Li gorî NY’ê rewşa xakên Filistînê yên ji aliyê Îsraîlê ve hatine dorpêçkirin, gelekî xirab e û lê xela heye. Artêşa Îsraîlê diyar kir ku ew ji sedî 75’ê Şerîda Xezeyê û ji sedî 40’ê kontrola bajarê Xezeyê di destê xwe de digire û da zanîn ku ew dixwaze kontrola bajarê Xezeyê bi temamî bi dest bixe.
Volker Turk ji welatan xwest ku divê firotina çekên hiqûqa şerî binpê bikin, bidin sekinandin, agirbest were dabînkirin, dilgirtî û kesên bi awayekî kêfî hatine binçavkirin werin berdan û ji bo gihandina alikariya mirovî ya ji destê wan tê bikin.
Hêjayî bibîrxistinê ye ku demeke kurt piştî ku Donald Trump vegeriya Koşka Spî, weke DYE’yê Îsraîl jî beşdarî nîqaşên Konseya Mafên Mirovan nebû.
