Rêxistinên ekolojîk, rapora bi navê “Rapora Aştiyê ya bi Xwezayê re” ku zirara xwezayê qeyd dike, ji bo ku ji Komîsyona Demokrasî, Xwişk-Biratî û Piştevaniya Mîllî ya li Meclîsê re bê pêşkêşkirin, radestî hevberdevkê Komîsyona Ekolojî ya DEM Partiyê Îbrahîm Akin kirin.
Piştî radestkirina rapora ku ji hêla 86 rêxistinan ve hatî amadekirin, di civîna çapemeniyê ya ku li navenda giştî ya Tarım Orkam-Senê hate lidarxistin de, aktîvîsta Koalîsyona Edaleta ya Îklîmê Ecehan Balta axivî û got: “Heta ku xweza wek kirdeyek neyê tevlîkirin, aştiyeke mayînde û adil ne gengaz e.”
Di raporê de mijarên wekî valakirina gundan, bendavên ewlehiyê, şewatên daristanan, herêmên qedexe, zirara ekosîstemê û qutkirina jinan ji xwezayê cih girtin. Rêxistinên ekolojîk daxwaz kirin ku xweza wekî kirdeyek bê naskirin, komîsyonên heqîqetê yên ekolojîk bêne avakirin û envantera zirara ekolojîk bê derxistin.
Parêzerê jîngehparêz Mehmet Horuş jî diyar kir ku ji bo aştiyeke mayînde, derxistina envantera wêraniya ekolojîk şert e û got: “Bêyî ku bi xwezayê re aşitî bê kirin, aştiya civakî nayê peydakirin. Îro bi gazê keviran, lêgerînên petrolê, santralên rojê û qirkirina daristanan, pêvajoyên ekoqirkirinê berdewam dikin.”
Rêxistinên ekolojîk her wiha bang li raya giştî kirin ku beşdarî civîna “parastina zeytûnan û aştiyê” ya ku wê vê yekşemê li Mûglayê bê lidarxistin bibin.
