Bi vegera gel a ji bo Şengalê her ku diçe ciwanên Êzidî berê xwe didin nav sazî û rêxistinên Rêveberiya Xweser a Şengalê û hêzên wê yên parastinê. Di vê çarçoveyê de 20 ciwanên Êzidî ji bo parastina civaka xwe bikin, beşdarî nav refên YBŞ’ê bûn.
Ciwanên Êzidî, li Akademiya Derwêşê Evdî di dewreya perwerdeyê ya Şehîd Fedakar de mehekê perwerdeya bîrdozî û leşkerî dîtin. Dewreya perwerdeyê bi merasîmeke leşkerî, her wiha bi beşdariya malbatên şervanan, nûnerên sazî û rêxistinên civaka Êzidî bi awayekî girseyî bi dawî bû.
Di merasîma leşkerî de li ser navê fermandariya YBŞ’ê, Reşîd Ebdî peyamek da. Di serî de, dewreya perwerdeyê ya şervanên nû li Rêber Apo û hemû civaka Êzidî pîroz kir û axaftina xwe wiha dewam kir: “Dewreyekê wiha bi navê şehîdan di Akademiya Derwêşê Evdî de, di vê demê de pir watedare û yek ji nirxên me yên pîroze. Lê yên ku rê li ber me vekirin wekî civaka Êzidî, bi keç û xortên xwe bi awayekî sîstematîk perwerdeyên bîrdozî bibînin û parastina axa xwe bikin, şehîdên korîdora mirovahiyê û milîtanên PKK’ê bûn. Di vê rêyê de, yên ku canê xwe feda kirine, em bi rêzdarî bibîr tînin.”
Reşîd Ebdî qala gefên li ser Şengalê berdewam kir û wiha got: “Wekî tê zanîn, planên siyasî ku li ser Şengalê tên meşandin di aliyê erdnîgarî, siyasî, civakî, olî û aborî de ne. Di vî alî de ji hemû civakên derdora me bêhtir, erk li ser milê me ye ku em xwe ji her kesî zêdetir perwerde bikin û di demên pêş de xwe ji hemû nêrînên ku li ser civaka me pêş bikevin, amade bikin. Em wekî di ser sifra guran de ne, divê em wisa nêzîk bibin. Ev sifre di dîrokê de jî her dem bûye hedefa guran û xwestine daqurtînin, lê çawa ku di dîrokê de ji serdema împaratoriya li welatê Xalta û heta roja me ya îro destdanîn li civaka me nehatiye jiyankirin, di serdema Keleşê Çelo, Mîskê Zaza, Hisênên Domelî û Derwêşê Evdî de û heta roja me ya îro, ev berxwedanî dewam dike. Berxwedana Êzidiyên Xilf û Dara û wê her ev berxwedanî nû bibe.”
Ji Fermandariya YBŞ’ê Reşîd Ebdî anî ziman ku berxwedana wan berdewama Ş. Zerdeşt û Pîr Çeko ye û wiha pê de çû: “Bila her kes bizanibe ku YBŞ’ê xwe di demên hebûn û nebûnê de daye qebûlkirin. Divê civaka me bizanibe ku ji bilî YBŞ’ê tu kes li parastina wan xwedî dernakeve. YBŞ bi xwînê, di dema rizgarkirina Şengalê de hatiye avakirin. Em bang li gelê xwe dikin ku pêşî li ber zarokên xwe vekin ji bo beşdarî nav refên YBŞ û YJŞ’ê bibin û ew jî bibin xwedî nasnameya şeref û rûmetê. Li ser vî esasî, em vê dewreya perwerdeyê li tevahiya gelê xwe pîroz dikin. Em bi hêvî ne ku ev dewreya perwerdeyê wê bibe bersiv û kelemeke di çavê dijmin de.”
Piştî axaftinê, şervanên YBŞ’ê li ser bîr û baweriyên Êzdatiyê, bi Laleşa Nûranî, Şehîdên Fermana 74’an û axa Şengalê sond xwarin û soza parastina civaka Êzidî dan. Piştre şervanên YBŞ’ê li ser yekîneyên xwe hatin belavkirin.
