Meşa bi pêşengiya Tevgera Jinên Azad (TJA) ku bi dirûşma ‘Em bi hêviyê ber bi azadiyê ve dimeşin’ ji Amedê ber bi Enqereyê ve destpê kir, di roja 3’yemîn de gihîşt Dîlokê. Jinên ku li vir ji aliyê bi hezaran kesî ve bi dirûşmeya “Jin, jiyan, azadî, azad bike Rêbertî” ve hatin pêşwazîkirin, bi erbaneyan derbasî qada kombûnê ya li Taxa Vatanê bûn. Jinên ku ji pencere û balkonan derketin, meşvanan silav kirin.
Dayikên Aştiyê bi pankart û kulîlkan meşvan pêşwazî kirin û piştre li ber stranên Kurdî govend gerandin.
Parlamentera Partiya Kedê Sevda Karaca axivî û bang li jinan kir û got: “Werin em bi hev re deriyên çareseriyê vebikin. Em bi hev re aştiyê ava bikin. Hûn hemû bi xêr hatin. Ne tenê jinên Kurd ji her alî jin mifteya çareseriyê ne. Werin bi hev re deriyên çareseriyê vebikin.”
PEYAMA AYŞE GOKKAN: AZADIYA OCALAN RONAHIYA HÊVIYÊ YE
Aktîvîsta TJA’yê Ayşe Gokkan, ku li Girtîgeha Jinan a Sîncanê ye, peyamek ji bo meşê şand. Endama TJA’yê Menal Temel peyamê xwend. Peyam wiha ye:
“Silav Rêwiyên Meşa Jin Jiyan Azadî
Em meşa we ya li dijî Komploya Navdewletî û tecrîda rûreş silav dikin. Bizanibin ku dîlgirtiyên azadiyê jî di vê meşê de gav bi gav li gel we ne.
Em nîvê cîhanê ne û gerdûna me di xeteriyê de ye. Mafê hêviyê nebe dê cîhan çawa ji roniya hêviyê sûdê bigire. Bi wesîleya meşa we, em bang hemû reng û dengên cîhanê dikin vê meşê mezintir bikin.
Werin em bi hev re li dijî komployên rûreş ên navdewletî têbikoşin û ji sînorên netewperest, olperest-mezhebperest, zayendperest, kapitalist û mîlîtarist bifilitin. Da ku em bikaribin roniya hêviyê li cîhanê belav bikin. Dem dema azadiyê ye; avakirina civaka demokratik di heman demê de azadiya Rêberê Roniya Hêviyê Ocalan e!Ne mafê hêviyê be, roniya hêviyê şewqê nade !”
‘BÊYÎ AZADIYA OCALAN JIN AZAD NABIN’
Siyasetmedar Hulya Alokmen jî banga mezinkirina têkoşînê kir û wiha domand: “Daxwaza me azadiya Birêz Ocalan e. Heta ku Birêz Ocalan azad nebe em jin jî ne azad in. Jin bi saya Birêz Ocalan heta îro hatine. Birêz Ocalan jiyana xwe da ser azadiya jinan. Ji ber vê daxwaza me ya herî mezin azadiya Birêz Ocalan e.”
Hevseroka Giştî ya Partiya Demokratîk a Herêman (DBP) Çîgdem Kiliçgun Uçar jî axivî û wiha got: “Ji bo em îradeya xwe nedin dewletê em li vir in. Em îro ji bo demokrasiyê, ji bo aştiyê ji bo êş neyên jiyîn dimeşin. Ji bo gel li gel hev bin em dimeşin. Divê di serî de mafê gelê Kurd û hemû gelan bê dayîn. Divê hiqûqek, destûrek bingehîn ya me hemûyan dihewîne hebe.”
