Kongreya Star a bajarê Qamişloyê yê kantona Cizîrê ya Bakur û Rojhilatê Sûriyeyê, bi daxuyaniyekê komploya navneteweyî ya li dijî Rêber Apo şermezar kir û piştgiriya xwe ji bo meşa ‘Em bi hêviyê ber bi azadiyê ve dimeşin’ ku Tevgera Jinên Azad (TJA) li Bakurê Kurdistanê û Tirkiyê daye destpêkirin anî ziman. Daxuyanî li ber Navenda Mihemed Şêxo ya Çand û Hunerê ya Qamişloyê ji aliyê mamoste Esmehan Se`do ve hat xwendin.
Di xwendina daxuyaniyê de endam û rêveberên Kongra Star a bajarê Qamişloyê amade bûn. Di daxuyaniyê de wêneyên Rêber Apo û alên Kongreya Star hatin hildan.
Daxuyanî wiha ye:
“Bi navê Kongra Star a Bajarê Qamişloyê em komploya navneteweyî ya ku li ser Rêber Apo pêk hat şermezar dikin. Ev komplo ne tenê li dijî kesayeta Rêber Apo, li ser tevayî mirovahiyê pêk hat. Ji ber fikir û felsefeya Rêber Apo ne tenê ji bo mafê Kurdan, ji bo mafê tevayî mirovahiyê, taybet ji bo mafê jinên cîhanê ye. Eger fikrê Rêber Apo li seranserî cîhanê belav bibe, wê wekhevî, demokrasî, hezkirin, hevjiyana azad, zanist û azadî pêk were û jin ji zincîrên koletiyê rizgar bibe. Ev jî ne li gorî berjewendiyên pergala desthilatê û baviksalarî ne.
Rêber Apo ev 27 sal e di nava çar dîwaran de ye, lê her peyman û nameyek wî ji bo mafê mirovahiyê, azadî, hevjiyana azad bû, gavên girîng ji bo aştî û demokrasiyê avêt. Lê heta niha ne dewleta Tirk a faşîst, ne jî dewletên navnetewî tu gav ji bo aştiyê neavêtine.
Em weke jinên ku ji felsefeya Rêber Apo ava jiyana azad vexwarine, em ê heta henaseya xwe ya dawî li pey vê dozê bin, heta Rêberê me bi awayê fîzîkî azad bibe û tevayî jinên cîhanê azad bibin.
Di dawiya daxuyaniyê de; em careke din dibêjin em ê li ser rêya fikir û felsefeya Rêberê mirovahiyê û aştiyê bin, heta Rêber Apo azad nebe, em tu carî azad nabin.
Em piştgiriya xwe bi pêngava tevgerên jinên Azad a Bakurê Kurdistanê didin xuyakirin.”
Piştî xwendina daxuyaniyê dirûşmên “Bê Serok jiyan nabe”, “Bimre koletî”, “Jin, Jiyan, Azadî” hatin berzkirin.
Piştî xwendina daxuyaniyê bang li tevayî jinan û gel hat kirin ku roja 9’ê Cotmehê tev li meşa şermezarkirina 27’emîn salvegera komploya navneteweyî û destpêkirina êrişên dewleta Tirk ên li ser Serêkaniyê û Girê Spî (9’ê Cotmeha 2018’an) bibin.
Tevgera Jinên Azad (TJA) di 1’ê Cotmehê de li Bakurê Kurdistanê û Tirkiyê bi dirûşma ‘Em bi hêviyê ber bi azadiyê ve dimeşin’ ji Amedê ber bi Enqereyê ve meşek da destpêkirin.
