Meşa “Em bi hêviyê ber bi azadiyê ve dimeşin” a bi pêşengiya TJA’yê ji Amedê destpê kir, ber bi Enqereyê ve dewam dike. 250 jin ên meşvan, piştî meşa li Mersînê wê 6’ê Cotmehê bigihêjin Enqereyê. Meşvan wê daxwazên xwe li meclîsê bînin ziman û bi partiyên din re hevdîtinê bikin. Meşa jinan bi heman coş û kelecanê dewam dike. Ji beşdarên meşê Gulistan Sevîm ku du sal in bi daxwaza aştî û azadiyê beşdarî hemû meşan dibe, di vê meşê de jî amade ye. Gulistan Sevîm ji Sêrtê beşdarî meşê bû. Ji malbata wê du kes di şer de jiyana xwe ji dest dan.
Gulistan Sevîm got, “Heta ku aştî û azadî pêk were ez ê bimeşim” û diyar kir ku ew vê biryardarî û îradeya xwe ji têkoşîna azadiyê ya jinan werdigire.
Gulistan Sevîm yekemcar meha Sibata derbasbûyî beşdarî “Meşa Azadiyê1” bû ku li dijî tecrîda li Îmraliyê hate lidarxistin. Piştî meşa ku 15’ê Sibatê bi dawî bû, meha Tîrmehê tevlî “Meşa Îradeyê” bû ku ji Wanê heta Colemêrgê li hemberî talankariya qeyûm hate lidarxistin. Niha jî di nava meşa jinan de ye.
Gulistan Sevîm anî ziman ku ji bo bidestxistin mafên gelê Kurd û bi armanca mezinkirina têkoşînê ew xwe ji çalakiyan nade alî û ragihand, ku azadiya gelan bi azadiya Rêberê Gelê Kurd Abdullah Ocalan dibe, lewma bang li her kesî kir ku bêdeng nemîne.
‘EV DAXWAZ CIVAKÎ YE, NE ŞEXSÎ YE’
Gulistan Sevîm ji bo pêkhatina aştiya civakî û bidawîkirina şer bang kir û got, “Weke jineke ciwan, ez ji bo aştî û azadiyê dimeşim. Em dixwazin dawî li vî şerî bê û bes xwîn bê rijandin. Yekane daxwaza me aştî ye. Daxwaza me ya azadiyê pêwîstiyeke civakî ye, ne tenê şexsî ye. Heta ku azad nebe, heta ku Birêz Abdullah Ocalan azad nebe, em zanin ku civak jî nikare azad bibe. Bi vî rengî ne çanda me, ne zimanê me yê dayikê ne jî jin nikarin azad bibin.”
‘DIVÊ EM XWEDÎ LI VÊ BANGÊ DERKEVIN’
Gulistan Sevîm qala êşên berê kir û got, “Di vê demê de min du xwişkên xwe ji dest da, dayika min gelekî êş kişand, lê belê ez naxwazim kesekî din biêşe. Ji bo mirov nemirin em îro di her çalakiyê de ne. Du sal in beşdarî hemû meşên ji bo aştiyê dibim, enerjiya xwe ji têkoşîna jinan werdigirim. Birêz Ocalan li Îmraliyê nikare fikrên xwe bi rengekî azad bîne ziman. Divê em xwedî li vê bangê û têkoşîna azadiyê derkevin.”
‘TÊKOŞÎNA JINAN ÎLHAMÊ DIDE MIN’
Gulistan Sevîm destnîşan kir ku fikrên Rêber Apo yên li ser mijara azadiya jinan îlhamê dide wê û got, “Felsefe û azadiya jinê ya Birêz Ocalan îro li tevahiya cîhanê belav bû. Ev meşa min jî wê heta pêkhatina aştî û azadiyê dewam bike Civak jî di vê mijarê de divê bi erk û berpirsyariya xwe rabe. Gelê Kurd jî ji bo xwedî li zimanê xwe yê dayikê, çand û xwezaya xwe derkeve divê têbikoşe. Ji bo li vê xakê êdî xwîn nerije, her kes karibe bi zimanê xwe yê dayikê biaxive û darên me neyên birîn, em ber bi Enqereyê ve dimeşin.”
‘DIVÊ ÎRADEYEKE JI DIL BÊ NÎŞANDAN’
Gulistan Sevîm diyar kir ku ji bo baweriya di nava gel de kêm nebe divê dewlet gaveke şênber biavêje û got, “Em weke gel ji bo aştiyê çi ji destê me tê dikin, lê belê dewlet gavekê neavêje ku ev yek zerarê dide baweriyê. Mirov êdî gaveke şênber dixwaze ne gotinê. Di her çalakî, her meşê de em heman daxwazan tînin ziman lê belê bêdengiyek heye. Eger bi rastî jî aştî tê xwestin, ji bo vê divê îradeyeke ji dil bê nîşandan. Baweriya me wê bi gavên bêne avêtin jinûve xurt bibe. Heta ku maseya aştiyê neyê avakirin, nepêkan e ku ev êş bi dawî bibe.”
