Parlamentera DEM Partî ya Rihayê Dîlan Kunt Ayan destnîşan kir ku çareseriya demokratîk a pirsgirêka Kurd tenê bi qanûnên ku rasterast pêvajoyê hedef digre, pêkan e û bilêv kir ku 11’emîn Pakêta Darazê vê bendewariyê pêşwazî nake.
Parlamentera DEM Partî ya Rihayê û Endama Komîsyona Edaletê ya Meclîsa Mezin a Tirkiyeyê Dîlan Kunt Ayan têkildarî 11’emîn Pakêta Darazê ji ANF’ê re axivî.
Dîlan Kunt Ayan destnîşan kir ku berovajî bendewariyên cidî yên civakê tê xwestin ku bi pakêtên darazê pergaleke dij demokratîk were avakirin û wiha got: “Mînak, dema ku 10’emîn Pakêta Darazê ket rojevê hatibû gotin ku sererastkirina înfazê ya nû bê kirin û ev yek di 2’ê Gulanê de pêk were, lê di vê pakêtê de têkildarî înfazê tu çareserî tune ye. Tu verastkirinekî ji bo girtiyên nexweş an jî tevgerîna Lîjneyên Çavderî û Îdareyê ya Girtîgehan wekî dadgehê, nehat kirin. Bendewariya her kesekî hebû. Mixabin ji pakêtê bêedaletî, bêhiqûqî û newekheviyekî mezin derket.”
ARMANCA DEMOKRATÎKBÛNÊ TUNE YE
Dîlan Kunt Ayan diyar kir ku ji 11’emîn Pakêta Darazê ev têgihiştin pir zelal tê dîtin û destnîşan kir ku ne gavekî demokratîkbûnê berovajî naverokekî ku otorîterbûnê xurt dike, hatiye amadekirin. Dîlan Kunt Ayan wiha got: “Di pêvajoya ku em tê de ne me gelek caran diyar kir ku astengiyên li pêşiya çareseriya bi rêyên demokratîk ên pirsgirêka Kurd ne bi pakêtan, divê bi qanûnên çarçove bên rakirin. Divê ev mesele bi qanûnên pêvajoyê were destgirtin. Em dibînin ku raya giştî derbarê qanûnên vê pêvajoyê de di nava bendewariyeke mezin de ye. Daxwaz û têkoşîna me ya ji bo ev qanûn zû bikeve Meclîsê dewam dike.”
Dîlan Kunt Ayan bal kişand ser pênaseya “tevgerên bêarî” ku di pakêtê de cih digire û got ku ev peyv li dijî teknîka hiqûqê ye û ji pêkanînên keyfî re vekirî ye.
LI DIJÎ MAFÊN ZAROKAN E
Dîlan Kunt Ayan îşaret bi verastkirinên ji bo zarokan jî kir û diyar kir ku verastkirinên cezayê yên derbarê zarokên ku ber bi sûckirinê ve hatine birîn, li djiî mafên zarokan e û ev tişt gotin, “Dixwazin cezayên ku ji bo zarokên di navbera 15-18 salî de hatine pêşbînîrkirin, bên zêdekirin. Lê divê em bi qanûna ku zarokan biparêze, cihên wan ên di pergala edaletê de biparêze, şert û mercên ku wan ber bi sûckirinê ve dibe eşkere bike û van mehkûm bike re mijûl bin. Li pêşiya me pêşnûmeyeke ku cezayên ji bo zarokan zêde dike û şert û mercên girtinê giran dike, heye. Em di vê mijarê de bi komîsyonên zarokan re hatin ba hev. Komîsyona me ya Mafên Zarokan xebatên cidî dimeşîne. Em ê vê pêşnûmeyê bi vî rengî qebûl nekin.”
ZIRARÊ DIDE BAWERIYA GEL A JI BO PÊVAJOYÊ
Dîlan Kunt Ayan destnîşan kir ku verastkirinên bi vî rengî yên li hemberî maf û azadiyan pêvajoya demokratîkbûnê asteng dike û diyar kir ku ev ji bo ku pakêt bi vî rengî xwe bê vekişandin, têdikoşin.
Parlamentera DEM Partî ya Rihayê Dîlan Kunt Ayan wiha got: “Beralîbûnên bi vê terzê li pêşiya civakîbûna pêvajoyê astengiyekî mezin çêdike. Qanûnên pêvajoyê bi pakêtan çênabe. Lê ev pakêt ji bo ku di nava civakê de întibaya ‘Tirkiye demokratîk dibe’ bê afirandin, tê bikaranîn. Di rastiyê de ev pakêt zirarê dide baweriya gel a ji bo pêvajoyê. Zirarê dide baweriya ji bo hiqûq û jiyana hevpar. Ji ber vê yekê em pakêtên bi vî rengî qebûl nakin. Dij demokratîk û otorîter dibînin. Em ji bo ku ev pêşnûmeya ku hîna nebûye qanûnî bê vekişandin, têdikoşin.”
