Partiya Wekhevî û Demokrasiyê ya Gelan (DEM Partî), Partiya Tevgera Kedê (EHP), Partiya Kedê (EMEP), Federasyona Meclisên Sosyalîst (SMF), Partiya Karkeran a Tirkiyeyê (TİP) û Partiya Azadiya Civakî (TOP) li Qada Esenyurt a Stenbolê bi dirûşlma “Ji bo nan, aştî, edalet û azadiyê bi hev re têbikoşin” mitîngekê li dar xistin.
Beşdarên mitîngê, cilên xwe yên neteweyî li xwe kiribûn û flamayên zer, sor û kesk ku hilgirtin û qad xemilandin. Bi hezaran kes li qadê bi dirûşmên “Bijî Serok Apo”, “Bijî berxwedana zindanan”, “Bijî şoreş û sosyalîzm”, “Mil bi mil li dijî faşîzmê” û “Bê Serok jiyan nabe” dengê xwe bilind kirin.
‘JI BO DEMOKRATÎKBÛNÊ EM Ê XWE BI RÊXISTIN BIKIN’
Mîtîng bi stranên Koma Vejîn dest pê kir. Piştre berdevka TOP’ê Julîana Gozen axivî û bal kişand ser girîngiya rêxistinbûnê û got: “Em ê li her derê xwe rêxistin bikin. Em li virin, ji bo em rêxistinbûna çîna kakeran xurt bikin em bi hemû hêza xwe dixebitin. Li taxên me çete û mafya xwe rêxistin dikin. Heta em nebin navnîşan wê ew ciwan biçin gel mafyayan. Hakan Tosun qetilkirin. Eger em xwe rêxistin nekin emê hîna Rojîn û Gulistanan bipirsin. Divê em ji bo pêşerojê xwe rêxistin bibin. Em aliyê aştiyê ne, lê em ê aştiyeke birûmet ava bikin. Ji bo demokratîkbûna vî welatî tiştên ku em bikin hene. Ev perpirsyariyeke mezin e.”
‘EM Ê BI SER BIKEVIN’
Serokê Giştî yê TÎP’ê Erkan Baş jî balikşand ser girtina rojnameger, şaredar û siyasetmedaran û got: “Bila tu kes teredut neke. Em aştiyê dixwazin. Ji ber ku xizan, zarok bedelên giran didin. Aştî ne diyariye. Aştî ked e, pêşeroje. Em ê bi ser bikevin.”
Berdevkê SMF’ê Mahîr Gurz jî wiha anî ziman: “AKP-MHP’ê li dijî ciwan, karker, jin, Elewiyan şerê topyekun da destpêkirin. Ev ne qedera me ye. Em dikarin biguherin. Ji bo vê divê em bên gel hev û xwe rêxistin bikin.”
Serokê Giştî yê EMEP’ê Seyît Aslan jî got: “Tayînkirina qeyûmdan didomin. Girtiyên Kobanê hîna girtîne. Selahattîn Demîrtaş, Fîgen Yuksekdag çi xwestin. Aştî xwestin. Lê ev pergala faşîst ew dîl girtin. Em ê hevalên xwe ji girtîgehan derxin.”
Serokê Giştî yê EHP’ê Hakan Ozturk jî bal kişand ser şert û mercên ku Rêber Apo têde ye û got: “Komîsyona li meclîsê giran dimeşe. Ger ku şert û mercên vê pêvajoyê Abdullah Ocalan bimeşîne wê demê divê şert û mercên wî bên başkirin.”
Cîgirê Serokê Giştî yê CHP’ê Gokhan Gunaydin jî axivî û got: “Ronahiya we ev qad ronî kir. Em ê rabin ser piyan û bimeşin. Silav be ji kesên ku azadiyê bilind dikirin re. Em têkoşîn û berxwedana xwe ne tenê ji bo xwe ji bo hemû kesî dikin.”
‘EM DI PÊVAJOYEKE DÎROKÎ DE DERBAS DIBIN’
Hevserokê Giştî yê DEM Partiyê Tuncer Bakirhan jî axivî û da zanîn ku ew ji bo pêşeroja kedkaran, bindestan, jinan, Elewiyan û Kurdan hatine gel hev û wiha axivî: “Em îro ji bo çar nirxên mezin, aştî, demokrasî, edalet û azadiyê hatin gel hev. Ji bo ev bikevin jiyanê em hatin gel hev. Ev dengê li vir bilind dibe dengê bi milyonan kesan e, ya Tirkiyeyê ye. Ev daxwazên li Esenyûrtê tên ziman, ne tenê yên Esenyûrtê ne, yên 86 milyon kesan e. Aştî ne tenê ya Kurdan e, ji bo 86 milyon kesan e. Em di pêvajoyek dîrokî de derbas dibin. Derfeteke dîrokî ya Birêz Ocalan girtiye ser xwe li pêş Tirkiyeyê ye. Ev derfet ji bo me hemûyan e. Birêz Ocalan ji bo ev xwîn raweste, ji bo ciwan nemirin gavek girîng avêt. Ji bo pêşeroja gelan ciwanan pêvajo da destpêkirin. Aştî her tim baş e. Heta ku hûn hebin em ê bi vê têkoşîna birûmet komareke adîlane û demokratîk ava bikin. ”
Piştî axaftina Bakirhan, mitîng bi dawî bû.
