Partiya Sûriyeya Pêşerojê bi armanca şîrovekirina rewşa siyasî civîneke li hola xwe ya li bajarê Şedadê yê kantona Cizîrê li dar xist. Girseyeke mezin a şêniyên bajar, bajarok û gundewarên Şedadê, hevserok û endamên Partiya Sûriyeya Pêşerojê, nûnerên hêzên leşker û saziyên sivîl beşdarî civînê bûn.
Hevserokê Partiya Sûriyeya Pêşerojê Ebid Hamid El Mihbaş ku di heman demê de hevserokê şandeya dan û standinan a Bakur û Rojhilatê Sûriyeyê ye geşedanên siyasî nirxandin. El Mihbaş anî ziman ku divê diyaloga siyasî berdewam bike ku siberojeke ewletir bo tevahiya Sûriyeyan were mîsogerkirin û got: “Em dixebitin ku çareserî bi rêya diyalogan pêk werin û mafên hemû gelan û ewlehiya herêmê werin parastin.”
El Mihbaş destnîşan kir ku serkeftina şoreşê ne berhema komek an aliyekî taybetî bû û got, serketin ji aliyê tevahiya Sûriyeyan ve hat bidestxistin û divê tevahî Sûriyeyî di şekildana Sûriyeya nû de şirîk bin.
Ebid Hamid El Mihbaş bal kişand ser hevdîtinên di navbera şandeyên Rêveberiya Xweser û hikumeta veguhêz de û destnîşan kir ku armanca van hevdîtinan ew e ku bighêjin tifaqekê ku mafên şêniyan mîsoger bikin û îstiqrara siyasî pêk bîne.
Ebid Hamid El Mihbaş di dawiya axaftina xwe de banga tevkarî û piştgiriya Rêveberiya Xweser kir û anî ziman ku beşdarî û tevkarî dê bibin wesîleya siberojeke baştir ji bo her kesî.
Beşdaran jî nêrînên xwe anîn ziman û geşbîniya xwe bi hewldanên Rêveberiya Xweser û baweriya xwe bi diyaloga siyasî anîn ziman. Her wiha îşaret pê kir ku ji bo aştî û geşbûn pêk werin ew amade ne piştgiriyê bidin.
