Ji bo gerîlayê HPG’ê Şiyar Destîna Zana (Fesih Vural) ê di 2020’an de li Metînayê şehîd bibû, li navçeya Wêranşar a Rihayê sersaxî hate danîn. Bi pêşengiya Komeleya Piştgirî û Çanda Piştevaniyê ya bi Malbatên ku Xizmên xwe li Axên Kevnar Winda Kirine (KATDER) girseyî serdana sersaxiyê hate kirin. Nûnerên partiyên siyasî, rêxistinên girseyî yên demokratîk û gelek kes tevlî serdanê bûn.
Tevlîbûna girseyê ji bo sersaxiya ku li Taxa Şirnexê li mala malbatê hate danîn, ji aliyê polîsan ve hate astengkirin. Dema ku girse xwest ber bi mala sersaxiyê ve bimeşe, ji aliyê polîsan ve hate astengkirin. Polîsan bi hinceta ku tevlîbûna bi girseyî ji bo sersaxiyê qedexe ye, hewl da asteng bike. Girseyê bertek nîşanî astengiyê da û li pêş mertalên polîsan çalakiya rûniştinê da destpêkirin. Endamên malbatê jî ji mala sersaxiyê derkein û tevlî çalakiyê bûn û bi dirûşmeya “Şehîd Namirin” hatin pêşwazîkirin.
Di dawiya çalakiyê de, sersaxî li kolanê hatin qebûlkirin. Bavê Şehîd Şiyar Destîna Zana, Behçet Vural diyar kir ku ew ê li gel girseyê bin û wiha got, “Ez heta dilopa dawî ya xwîna xwe li vir im. Heta ku kesek bîmîne, ji vir veneqetim.”
Kesên derdor tevî dorpêça polîsan jî xwarinên xwe yên malê bi girseyê re parvekirin. Ciwanan di bin dorpêçê de agirê berxwedanê pêxistin û gelek caran dirûşme berzkirin. Sersaxî heta derengiya şevê bi malbatê re hate qebûlkirin û di dawiyê de bi daxuyaniyê bertek nîşanî astengiyên polîsan hate dayîn.
Parlementerê DEM Partî yê Rihayê Omer Ocalan wiha got, “Nêzîkatiya îro di tu ol û civakê de tune ye. Gelê me bi salan bi canên xwe berdêl dan. Ew rûmeta vî gelî ne. Em bi malbata xwe serbilind in û xwedî li sersaxiya xwe derkevin.”
Dayika Aştiyê Adalet Kaya jî wiha got, “Pêşî ya me girtin. Em ê tu car şehîdên xwe ji bîr nekin û di rêya wan de biçin.”
Daxuyanî bi dirûşmeya “Şehîd Namirin” bi dawî bû.
