13. Konferansa Komîteya Malbatên Şehîdan a Wargeha Şehîd Rustem Cûdî (Mexmûr) bi diruşmeya ’Li şehîdan xwedî derketin bi avakirina civaka demokratîk û komînal pêkane’ hate li darxistin. Di konferansê de gelek nirxandin û nîqaş hatin meşandin. Taybet jî rol û mîsyona malbatên şehîdan ya di Pêvajoya Aştî û Civaka Demokratîk de hate nirxandin. Di heman demê de mêvan ji Şengalê jî hatibûn û beşdarî konferansê bûn.
Delegeyên 13. Konferansa Komîteya Malbatên Şehîdan ji ANF’ê me re axivîn û dan zanîn ku divê demildest dewleta Tirk ji bo rêveçûna pêvajoyê gavan bavêje.
Endama Koordînasyona TAJÊ Neam Bedel ku ji bo konferansê ji Şengalê hatibû wargehê, di destpêka axaftinên xwe de konferans li Rêber Apo û tevahî gelê wargehê pîroz kir û got: “Em wek dayîkên Şengalê vê konferansê li Rêberê xwe û malbatên şehîdan pîroz dikin. Em di wê bawerî û hêviyê de ne ku wê ev konferans bibe konferansa azadiya fîzîkî ya Rêber Apo. Pêvajoya ku Rêber Apo dayî destpêkirin wê serbikeve. Emê bi saya vê pêvajoyê bigihijin mafê xwe. Em wek dayîkên Şengalê dixwazin hemûkes ji aliyê xwe ve piştgirî bide vê pêvajoyê.”
‘DIVÊ EM XWEDÎ LI MALBATÊN ŞEHÎDAN DERKEVIN’
Dayê Neam di dewama axaftinên xwe de ev peyam ji tevahî malbatên şehîdan re da: “Em hêvî dikin ku tevahî malbatên şehîdan xwedî li vê pêvajoyê derbikevin û li erkên xwe rabin. Ji ber ku ev pêvajo bi saya keda şehîdan hatiye destpêkirin û pêşengtiya wê jî Rêber Apo dike. Divê em xwedî li malbatên xwe yên şehîdan derbikevin. Li kuderê be divê em yekitî û komînên xwe avabikin. Ev pêvajo niha tenê ji aliyê Rêber Apo ve meşandin. Dewlet bêdenge. Divê demildest dewlet gavan bavêje. Em dixwazin dewletên navnetewî zextê li Tirkiyê bikin da ku gavan bavêjin. Raste komîsyonek heye, lê belê karê xwe nake lewaz dimeşe. Em carekdin vê konferansê diyarî tevahî şervanên azadiyê re dişînim.”
KONFERANS DIYARÎ RÊBER APO HATE KIRIN
Her wiha li ser heman mijarê xebatkarê bi navê Sadiq Nêrwehî jî di serî de konferans diyarî Rêber Apo kir û wiha axivî: “Em jî wek xebatakrên wargehê vê konferansê diyarî Rêber Apo û tevahî malbatên şehîdan dikin. Konferansa me baş derbas bî, xebat û keda hatî kirin hate nirxandin. Her wiha pêvajoya hatî destpêkirin jî hate nîqaşkirin. Rêber Apo pêvajoyek ya aştiyê daye destpêkirin, em heta dawî piştgirî didin vê pêvajoyê. Rêber Apo PKK fesih kir, çek şewitandin û niha jî gerîla ji Tirkiye û Bakurê Kurdistanê vekişandin. Ev bixwe gavên dîrokî û cidiyeta pêvajoyê dide nîşandan.”
‘DIVÊ DEWLET DAWÎ LI BÊDENGIYA XWE BÎNE’
Sadiq Nêrwehî herî dawî ev bang li malbatên şehîdan û tevahî gelê welatparêz kir: “Rêber Apo tişta ku jê hatî kir. Lê belê dewlet vê aliyê de bêdenge. Em hêvî dikin ku demildest gav bên avêtin û pêvajo bi serkeftî bi encam be. Ev pêvajo ji bo xûşk û biratiya Kurd û Tirkan girînge. Ger em nebin yek bi sedan salên din em nikarin xwe komîserhev bikin. Ev pêvajo ji ber wê girînge. Em bang li malbatên şehîdan û tevahî azadîxwazan dikin, ji bo serkeftina vê pêvajoyê tevlî kar û xebatan bibin. Wê encama vê kedê serfirazî be. Carekdin em vê konfernasê pîroz dikin.”
