Navenda Ragihandina Hêzên Sûriya Demokratîk (QSD) li ser malpera xwe ya fermî ragihand ku Akademiyên Şehîd Ednan Ebû Emced 4 dewre ji bo 80 şervanên xort û keç yên QSDˊê yên ji tevahî herêmên Bakur û Rojhilatê Sûriyeyê bi dawî kirin.
Bi bawer û israreke nayên şikandin Akademiyên Şehîd Ednan Ebû Emced 4 dewreyên nû yên pispor li Reqayê bi dawî kirin. Di dewreyan de 80 şervanên xort û keç ji tevahî herêmên Bakur û Rojhilatê Sûriyeyê amade bûn.
Navên dewreyan bi navên şehîdan bûn û wiha ne; Kerem El Şehabî, Xebat Tirkman, Baran (Girê Spî) û Aram Can.
Ji bo bilindkirina karîgerî, dîsplîn û gihiştîna astên amadekariya leşkerî dewr 4 meh û nîvan dom kir. Di dewreyan de şervanên perwerdeyên siyasî, fikrî û leşkerî bi çavdêriya kadroyên taybet ji QSDˊê wergirtin.
Şahiya derçûnê bi rê û resmên fermî li dar xist û tê de nûnerên ji saziyên sivîl û leşkerî û girseya xelkê bajêr amade bûn. Wan serbilindiya xwe bi keç û xortên xwe yên tev li QSDˊê bûne nîşan da.
Rêûresmên derçûnê bi deqeyeke rêzgirtinê dest pê kir. Dûre merasîmdk leşkerşî ya heybet ji hêla derçûyan ve hat pêşkêşkirin.
Di şahiyê de fermandarê QSDˊê Riyad El Xelef axivî û diyar kir ku fedakariyên şehîdan ji bo ronîkirina rêça şervanan a ber bi azadî û rûmetê ve çira bimîne û xîtabî derçûyan kir û got, “Hûn îro berdewama wan kesên ku ruhê xwe ji bo xak û gel feda kirine, ye. Rêya têkoşînê dirêj e, lê em ê heta dawiyê dewam bikin û nehêlin dijmin destkeftiyên gelê me yan jî yên şehîdên me têk bibin.”
El Xelef diyar kir ku “QSDˊê di pêşxistin û pêşdeçûna şiyanên xwe yên leşkerî û fikirî de dewam dike, ji bo rûbirûbûna her şêweyên gefan çi derve ji aliyê dewletên timaker ve yan jî hundirîn ji aliyê şaneyên teror ve ku hewl didin aramiya herêmê têk bibin.”
Di dawiya merasîmê de, derçûyan sonda leşkerî xwar û soza da ku parastina xakê, destkeftiyên şoreşê û bervaniya sivîlan bikin û got ew amade ne li hember her dijminekî Bakur û Rojhilatê Sûriyeyê hedef bigire, bisekinin.
