Di 15’ê Mijdarê de pira demkî ku li madena kobaltê hatibû danîn, hilweşiya û li gorî encamên destpêkê herî kêm 32 kes mirin.
Rayedaran diyar kirin ku lêgerîna ji bo dîtina madenvanên winda berdewam dike û gotin ku fikar hene ku hejmara qurbaniyan zêde bibe.
Şert û mercên hawirdor ên cihê bûyerê û metirsiya hilweşînên din, xebatên komên rizgarkirinê zehmetir dike.
Hat diyarkirin ku piraniya kesên ku mirine destkarên biçûk bûn ku li herêmê dixebitin. Li gorî rayedarên xwecihî zêdetirî 10 hezar madenvan li Kalando dixebitin.
DAXUYANIYÊN BI NAKOK
Daxuyaniyên têkildarê bûyerê ji hev cuda ne. Wezîrê Karên Hundir yê Eyaletê Roy Kaumba Mayonde diyar kir ku ji ber barana zêde û îhtîmala hilweşînê ketina herêmê hatiye qedexekirin, lê tevî wê ‘madenvanên qeçax qedexe binpêkirine û ketine herêmê.”
Li gorî rapora ku ji aliyê Servîsa Piştgirî û Destkarên Biçûk a Madenvaniyê (Saemape) ya girêdayî hikûmetê hatiye amadekirin û ji aliyê AFP’ê ve hatiye parvekirin, tê diyar kirin ku ji ber hebûna leşkerên di hundurê madenê de liv û tevgerek a panîkê çêbûye û bûye sedema mirinan.
ŞERT Û MERCÊN XETERNAK
Ev karesat şert û mercên xebatê yên pir xeternak ên madenvanên esnaf ên li welêt dîsa xistiye rojevê. Kongo ji sedî 70 zêdetir kobaltê cîhanê hildiberîne û zêdetirî 200 hezar kes di madenan de bêdestûr di bin şert û mercên xeternak de dixebitin.
Rayedar diyar dikin ku pêdivî bi tedbîrên ewlehiyê û kontrolên xurtir li ser madenan qaçax hene.
