Di ser hilweşîna rejîma Beşar Esad re salek derbas bû. Bajarê Siwêda yê li başûrê Sûriyeyê, ku piraniya şêniyên wê Durzî ne û bi xwepêşandanên xwe yên aştiyane yên li dijî rejîma berê ya Baasê tê naskirin, di nava vê salê de vê carê bû hedefa êrişên Hikumeta Veguhêz a Sûriyeyê, DAÎŞ û HTŞ’ê.
Ji bo şêniyên Siwêdayê ev sal nebû sala destpêka guherînê ku dihate hêvîkirin, lê bû demeke welê ku rewş hîn bêhtir nediyar bû, xizanî û jihevketina civakî girantir bû.
Şêniyên Siwêdayê yên li nava bajêr ji me re axivîn, diyar kirin ku hêvî û bendewariya ji bo azadî û aramiyê pûç bûn, berevajî vê yekê mercên jiyanê ji dema Esad bêhtir xerab bûne.
Îsam Nasir ji ANF’ê re qala sala dawî kir: “Ji ber ku rejîm ket, em bi hêvî bûn. Lê belê piştî salekê em dibînin ku tiştek neguherî ye, di ser re hîn bêhtir nebaş bûye. Rejîma berê civak helandibû, niha jî ev parçebûn girantir bûye. Ne bawerim ku welat li halê xwe yê berê vegere. Yekîtiya neteweyî di nava van şert û mercand e veguheriye meseleyeke zehmet. Di rewşa heyî de yekane fikara me ew e ku em sax bimînin û karibin jiyana xwe dewam bikin.”
Ji şêniyên bajêr Selam Bahsas jî bi gotinên tund rexneyê li rêveberiya nû dike: “Esad çû, lê belê mejiyê yên hatine hîn tarî ye. Yên hatine bi mejiyê DAÎŞ’ê ne, hêzeke bê pîvan e. Ne elektrîk heye, ne av, ne jî sotemenî. Ragihandin bi temamî hilweşiya ye. Doh me dengê xwe ji bo azadiyê bilind dikir, lê îro welê li me hatiye ku em li lîtreyeke benzînê, ji bo saetekê li elektrîkê digerin. Em bi tabloyeke welê re rû bi rû ne ku ji rejîma berê xerabtir e.”
“Ji hilweşîna rejîma Beşar Esad û vir ve di jiyana me de guhertineke baş û erênî nebû. Ji dema rejîma berê bêhtir em di rewşeke xerab de ne, desthilatdariya heyî bi rengê DAÎŞ’ê ye, hêzeke terorîst e, pîvaneke xwe nîne. Li welêt rewş gelekî xerab e.”
Bahsas bal kişand ser hilweşîna xizmetên bingehîn ên li bajêr û got, “Elektrîk, av, sotemenî û pêwîstiyên bingehîn hema bibêje bi temamî tine bûye. Bingeha ragihandinê jî gelekî lawaz e, ev yek jî jiyana rojane zehmet dike.”
Şêniyên herêmê dibêjin, xizmetên ku demekê ji rêzê dihatin dîtin îro bi temamî ji holê rabûne, jiyan bi xwe veguheriye têkoşînekê. Beşeke mezin a Sûriyeyiyan ku li benda guherîna demeke dirêj li bendê bûn, ewlekariyê heta bi binesaziyê ji ber mercên nebaş ên li her qadê bi tabloyeke reşbîn re rû bi rû ne.
Di nava salekê de ku rejîma Esad hilweşiya, ji ber ku li gelek herêmên Sûriyeyê xizmetên bingehîn nayên kirin, hêviya ji bo vegera li jiyaneke aram lawaz kiriye.
