Gaziyê şer Rêzan Masîro têkildarî yek ji rêveberên Federasyona Gaziyên Bakur û Rojhilatê Sûriyeyê, Azadî Helebçe ya di pêvajoya tedawiyê de şehîd bû nêrînên xwe anîn ziman.
Rêzan Masîro di destpêka axaftina xwe de şehîd Azadî bi bîr anî û wiha got, “Di nav Tevgera Azadiyê de bêguman şehadet û birîndarî jî hene. Dema me berê xwe da nav refên azadiyê me ew hemû tişt dan ber çavan û em hatin. Mirov bi şehadetên hevalan pir bandor dibe. Ya girîng jî ew e mirov ala hevalên xwe yên şehîd li erdê nehêle û weke hevrêyên wan têkoşîna xwe bidomîne. Ji ber hevalên me dema diçin şehadetê dizanin wê hevalên wan têkoşînê berdewam bikin. Ev bawerî û biryardariyeke pir bedew û pîroz e.”
Gaziyê şer Rêzan bal kişand ser taybetmendiyên şehîd Azadî û ev anî ziman, “Min heval Azadî cara pêşî di pêvajoya tedawiyê de dît. Ew jî hatibû tedawiyê, lê te digot qey tİ nexweşî û êşên wê nînin, bi me re eleqedar dibû. Vê rewşê pir bala min kişandibû. Yek taybetmendiya heval Azadî ya herî zêde bala min dikişand jî, rûkenî û dilnizmiya wê bû. Heval Azadî weke hevrêyeke gazî bi rastî hevalên gazî fêm dikir. Hesasiyetên hevalên gazî dizanî û li gor wê nêzî mirov dibû. Lê tişta herî girîng jî rastî û cidiyeta wê bû. Dikarî bi saetan te guhdar bike. Li ser rûyê tebesum û ken her tim zindî bû. vê jî dihişt ku mirov karibe xwe li cem heval Azadî rehet his bike.”
Rêzan destnîşan kir ku şehîd Azadî pir girîngî dida pêşketina hevalên gazî û wiha domand, “Hevala Azadî dixwest hevalên gazî di aliyê fikir û bîrdozî de xwe pêş bixin. Lewma dema didît hevalek dinivîse pir kêfxweş dibû. Bi wan re guftûgo dikir. Ew bi xwe jî nivîskar û helbestvan bû. bi Kurmancî û Erebî gelek nivîs û helbestên wê hene. Weke hevalekî gazî ez gelek tişt ji heval Azadî fêr bûm.”
Gaziyê şer Rêzan Masîro diyar kir ku ji bo hevala Azadî nas kiriye xwe pir bi şans his dike û wiha axivî, “Hevala Azadî bi jiyan, kesayet, nêzîkatî û taybetmendiyên xwe jineke Apoyî bû. Li cihê hevala Azadî lê bûya aramî, ewlehî hebû û baweriyek bi mirov re çêdibû. Weke hevalên gazî em ê heval û pêşenga xwe ti carî ji bîr nekin. Em ê bi biryardarî û têkoşîna heval Azadî meşa xwe ya jiyana azad bêteredut bimeşînin. Ji bo weke hevalên gazî em bibin layiqî heval Azadî ji her demê zêdetir em ê di nav kar û xebatan de cih bigirin.”
