Di çarçoveta Pêvajoya Aştî û Civaka Demokratîk de, xebatên komîsyona ku li Meclîsê hate avakirin, dewam dike. Serokê Meclisê Nûman Kûrtûlmûş bi koordînatorên partiyên siyasî yên di komîsyonê de cih digirin li hev civiya.
Di hevdîtinê de Serokwekîla Koma DEM Partiyê Gulistan Kiliç Koçyîgît, Cîgirê Serokê Giştî yê MHP’ê Fetî Yildiz, Serokê Koma AKP’ê Abdulhamît Gul, Serokwekîlê Koma CHP’ê Mûrat Emîr û Serokê Koma Yenî Yolê Bulent Kaya di civînê de amade bûn û nêzî saetek dewam kir.
Di hevdîtinê de raporên partiyên siyasî amade kirine û rapora giştî ya ku komîsyonê amade kiriye, hate nîqaşkirin. Li gorî agahiyên hatin bidestxistin, hate destnîşankirin ku partiyên ku hîna rapora xwe radest nekirine divê heta roja Înê pêşkêşî komîsyonê bikin.
RAPORA HEVPAR WÊ PIŞTÎ SERÊ SALÊ PÊŞKÊŞÎ MECLÎSÊ BÊ KIRIN
Cîgirê Serokê Giştî yê MHP’ê Fetî Yildiz, piştî civînê pirsên rojnamevanan bersivand û diyar kir ku rêbazên amadekirina raporeke hevpar hatine nîqaşkirin û wiha got, “Em ê roja Duşemê dîsa bicivin. Di hefteyên pêş de rapora hevpar amade bikin. Em ê piştî serê salê raporê pêşkêşî Meclîsê bikin.”
Yildiz bilêv kir ku ji her partiyê ku koma wan heye, wê kesek ji bo raporê were erkdarkirin û da zanîn ku xebat wê bi koordînatorên heyî re dewam bike. Li ser pirsa têkildarî dema xebata komîsyonê jî wiha got, “Ger heta 31’ê Kanûnê negihe, dikare were dirêjkirin.”
KOMA NIVÎSÊ TÊ AVAKIRIN
Di civînê de biryar hate girtin ku ji bo amadekirina rapora komîsyonê, koma nivîsê bê avakirin. Hate diyarkirin ku partiyan wê ji bo vê komê endamek xwe diyar bikin û koma nivîsê heta roja Duşemê bi li ber çavan derbaskirina rapora pêşnumeyê bi halê dawî radest bike. Bi vî rengî tê armanckirin ku rapor bi îmzeya hevpar a hemû partiyan were amadekirin.
Hate hînbûn ku Parlamenterê Stenbolê Cengîz Çîçek di koma nivîsê ya DEM Partiyê de cih bigire. Tê gotin ku CHP’ê jî ji bilî metna ku berê radest kiriye, roja Înê raporeke berfirehtir pêşkêş bike. Tê diyarkirin ku AKP roja înê rapora xwe ya nêzî 70 rûpelî pêşkêşî komîsyonê bike, lê dibe ku ji ber pêvajoya erêkirina rapor derengketin çêbibe.
DIBE KU DEMA KOMÎSYONÊ BÊ DIRÊJKIRIN
Tê armanckirin ku rapor beriya serê salê were temamkirin, lê ger pêvajo dirêj bike, dema xebata komîsyonê ku wê di 31’ê Kanûnê de tijî bibe, bi îmzeyê mehek din jî were dirêjkirin. Tê payîn ku ger rapor di komîsyonê de were qebûlkirin, partiyên siyasî ji bo di Lîjneya Giştî ya Meclîsê de hevdîtina giştî were kirin daxwazname bidin.
