FEDA û DAKB’ê ji ber salvegera komkujiyên Mereş, Roboskî û komkujiya girtîgehan a 19’ê Kanûnê daxuyaniyek weşandin.
Di daxuyaniyê de hate ragihandin ku meha Kanûnê di dîroka nêz a Tirkiye û Kurdistanê de yek ji wan deman e ku li hemberî Elewiyan, şoreşgeran û Kurdan komkujiyên herî giran hatin kirin û êrişa 19-26’ê Kanûna 1978’an a li Mereşê weke “Êrişeke plankirî, rêxistinkirî û di bin çavdêriya dewletê de bi armanca tinekirina olî û etnîkî” li dijî Elewiyên Kurd-Tirk hatiye kirin.
Di daxuyaniyê de hate ragihandin ku taxên Mereşê hatin dorpêçkirin, rê hatin birîn, bajar bi rojan hate dagirkirin û hate bibîrxistin ku êrişkaran malên ku berê işaret kiribûn, êrişî wan deveran kirin. Di daxuyaniyê de hate gotin, êriş bi dirûşmên ‘Elewiyan paqij bikin’, ‘Îro roja cîhadê’ ye’ hate kirin û hate destnîşankirin ku dewletê ev pêvajo meşand; polîs û leşkeran destwerdan nekirin.
JI GIRTÎGEHAN HETA BI ROBOSKÎ TUNDÎ
FEDA û DAKB’ê bi bîr xistin ku 19’ê Kanûna 2000’î di bin navê Operasyona Vegera li Jiyanê de li 20 girtîgehan di heman demê de êriş hatin kirin, zêdeyî 30 girtiyên siyasî hatin qetilkirin, bi sedan jî birîndar bûn.
Her wiha hate ragihandin ku 28’ê Kanûna 2011’an li gundê Roboskî yê Şirnexê di encama bombardûmana balafirên artêşa Tirk de 34 gundiyên Kurd hatin qetilkirin. FEDA û DAKB’ê diyar kirin ku kiryarên êrişên navborî nehatin darizandin, dosya wan hate tarîkirin û têkoşîna edaletê ya malbatan dewam dike.
‘HETA KU HEQÎQET NEYÊ RONÎKIRIN AŞTÎ ÇÊNABE’
Di daxuyaniyê de hate gotin, ev mînakên ji Mereşê heta bi Roboskî, ji girtîgehan heta bi gundan nîşaneya polîtîkaya tinekirinê ya rêxistinkirî ya li hemberî gelê Kurd e û hate ragihandin, ev dema ku nîqaş li ser aştî û civaka demokratîk tê kirin ji bo rûbirûbûna bi heqîqetê re firsendeke girîng e.
Di daxuyaniyê de hate gotin, “Heta ku rûbirûbûn nebe edalet nabe, heta ku edalet nebe aştî nabe” û hate destnîşankirin ku wê destûrê nedin ku komkujî û qirkirin bêne jibîrkirin.
