Rojnamevan Şêrwan Şêrwanî ku 5 salin li girtîgehê ye, bi rêya parêzerê xwe peyamek ji raya giştî re şand. Di peyamê de balê dikişîne ser rewşa xwe û girtiyên li Girtîgehên PDK’ê.
Şêrwan Şêrwanî ev peyam da: “Di her qawişek 10 kesî de 25-30 kes tê ragirtin. Li ser textên hişk û sermaya zivistanê dirazin. Ji bo her yekê du betanî didin, ne qilîma, ne mehfûr û ne jî ava germ heye. Ji bilî çend demjimêran di nava hefteyê de ava germ nîne. Hinek caran nagihêjî serê xwe jî bidî ber sar dibe.”
Di dewama peyamê de hate destnîşankirin ku rayedarên girtîgehê rê nadin sobe û amûrên elektirîkê yên germkirinê bên bikaranîn û her wiha rê nayê dayîn ji derve jî betanî bê anîn û got: “Ji ber rêgirî û astengiyan, cilên zivistanê nîva havînê digihije.”
Di dewama peyamê de hate gotin ku ev tiştên anîne ziman tenê ji çend pirsgirêkên li Girtîgeha li Hewlêrê ye.
Şêrwan Şêrwanî di peyama xwe de gilî li rêveberê girtîgehê dike û dibêje; “Birayê Rêveberê Giştî yê Girtîgeha Gewran xwe amade dike ji bo wergirtina xelata Mandela ya ji bo nûjenkirina girtîgehan.!”
Rojnamevan Şêrwan Şêrwanî zêdetirî 5 sal in girtî ye. Meha Sibata 2022’an bi feraman Serokê Herêma Kurdistanê Nêçîrvan Barzanî ji sedî 50 cezayê wî hate kêmkirin. Li gorî biryarê diviyabû meha Îlona 2023’an bihata berdan. Her carê bi hincetek cezayê wî tê dirêjkirin.
Şêrwan Şêrwanî 20’ê Tîrmeha 2023’an li gorî xalên 298 û 295’an bi yasaya cezayê Iraqê 4 sal cezayê girtîgehê lê hatibû birîn.
