Endamên Platforma Saziyên Demokratîk ên ku li Qada Şîşhane ya Stenbolê li hev civiyan, êrîşên komên çete yên girêdayî Hikûmeta Demkî ya Sûriyeyê li ser taxên Eşrefiyê, Şêxmeqsûd û Benî Zêdê protesto kirin. Di çalakiyê de pankarta “Xwedî derketina Rojava, xwedî derketina mirovahîye ye… Rojava wîjdan e, azadî ye, berxwedan e, nayê teslîmgirtin” hate vekirin. Beşdaran gelek caran dirûşmeyan berzkirin.
Endamê Meclîsa DEM Partiyê Unal Yusufoglu îşaret bi berxwedana Kobanê kir û wiha got, “Her kesên ku hêviya wan ji siberojê heye, îlhamê ji Rojavayê digrin. Li Tirkiye û Rojhilata Navîn hewaya aştiyê heye. Mirov ji ber jiyana hevpar têkoşînê didin.”
Berdevka Platforma Piştevaniya Sosyalîst (SODAP) û Parlamentera DEM Partî ya Stenbolê Kezban Konukçû jî wiha got, “Em piştgirî didin têkoşîna wekhevî û xwiş-biratiyê ya gelên Sûriyeyê.”
Hevberdevkê Kongreya Demokratîk a Gelan (HDK) Alî Kenanoglu jî wiha got, “DAÎŞ’ê yên ku cilên xwe guhertine, pêşî êrîşî Elewiyan, niha jî êrîşî Kurdan dikin. Dixwazin ku li wê derê tenê gelên ku bi bawerî, serwerî û zimanê wan dijîn, hebin. Lê ev ne li gorî rastiya Sûriyeyê ye. Em ê têkoşîna xwe li kêleka wan bidomînin.”
Hevserokê DEM Partî yê Stenbolê Arîfe Çinar jî wiha got, “Li Helebê gel demeke dirêj e di bin dorpêçê de ye. Ev sê roj in çtetên DAÎŞ’ê bêyî ku bibêjin jin û zarok êrîşî sivîlan dikin. Pirsgirêk ne Kurd, Suryanî yan jî Ereb e, pirsgirêk çeteyên DAÎŞ’ê û SMO’yê ne.”
Hevberdevka DEM Partî ya Stenbolê Ayfer Çelîk diyar kir ku êrîş sûcê mirovahiyê ne û wiha got, “Gelê Kurd li dijî van êrîşan ne bi tenê ye, wê mafê berxwedanê ya rewa bi kar bîne.”
Çelîk bang li hêzên navneteweyî jî kir û wiha got, “Divê sivîl werin parastin, êrîş werin rawestandin û sûcdar werin teşhîrkirin. Bêdengî hevkariya sûc e.”
Piştî daxuyaniyê, herî kêm 30 kesên ku tevlî çalakiyê bibûn, hatin binçavkirin. Di nava kesên hatine binçavkirin, navên wekî Çetîn Demîr, Ahmet Gucîn û Vedat Çekîk hene.
