Hevseroka Daîreya Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed têkildarî êrişên li Helebê daxuyaniyeke berfireh da.
Îlham Ehmed bi berfirehî qala sûcên li hersê taxan kir ku zêdeyî 500 hezar sivîl lê bûn û nîşan da bê kîjan hêz tevlî êrişan bûne.
JI MALBATA MIN 7 KES BI DRONEYÊ HATE QETILKIRIN
Îlham Ehmed her wiha di civîna çapemeniyê de ku bi rêya zoomê pêk anî, anî ziman ku li taxa Şêxmeqsûdê ji malbata wê 7 kes di otobusekê de bi droneyê hate qetilkirin û got, “Tenê ji malbata min li Şêxmeqsûd heta niha 7 kesan jiyana xwe ji dest dan. Dema ku di hundire otobusekê de bûn bi droneyekê lê dan û ji malbata min 7 kesan jiyana xwe ji dest dan. Ji bilî vê yekê hejmara sivîlên jiyana xwe ji dest dan gelekî zêde ye. Malên mirovan têne talankirin. Cenazeyên şervanên jin ji avahiyan têne avêtin.”
Îlham Ehmed bi bîr xist ku li taxên Şêxmeqsûd, Eşrefiyê û Benî Zêd ên Helebê li gel mirovên ji Efrînê bi zorê hatin koçberkirin zêdeyî 500 hezar sivîl hebûn û anî ziman ku ev hersê tax bi mehan ji aliyê hêzên rejîmê ve hate dorpêçkirin.
DESTPÊKA ÊRIŞAN
Bi dewamî bi bîr xist ku 6’ê Çileya 2026’an komên ser bi hikumeta Şamê êrişeke berfireh a leşkerî birin ser taxên Şêxmeqsûd û Eşrefiyê ku tumenên 60, 62, 72 û 86 ên artêşa Sûriyeyê tevlî êrişê bûn. Her wiha anî ziman ku di êrişan de wesayitên zirxî, yekîneyên topê yên giran, roketavêjên grad û katyûşa, topên hawanê û droneyên bombeyî hatin bikaranîn.
Îlham Ehmed diyar kir ku êriş bi zanebûn li binesaziya sivîlan hate kirin û got, “Li gel nifûsa zêde ya sivîlan jî Wezareta Parastinê ya Sûriyeyê taxên Şêxmeqsûd û Eşrefiyê weke ‘herêma leşkerî’ ragihand. Piştî vê ragihandinê herêm bi çekên giran hate bombekirin.”
Îlham Ehmed ragihand ku 8’ê Çileyê komên cîhadîst ên li ser xeta tund a Asaib al-Hamra yên El Qaîdeyê jî ketin dewrê û êriş hîn giran bû. Îlham Ehmed got, “Ji Idlib û bajarên din jî hêz hatin. Komên SNA yên bi piştgiriya Tirkiyeyê tevlî operasyonê bûn û dewleta Tirk jî bi balafirên bêmirov (Bayraktar) piştgiriya hewayî û îstîxbaratî da êrişan. Ji sibeha 8’ê Çileyê û pê ve operasyon ji aliyê Serokê Fermandariya Giştî ya Artêşa Sûriyeyê Tumgeneral Alî al Naasan ve hate birêvebirin.”
ÊRIŞÊN BEJAHÎ Û ÊRIŞÊN LI SER NAVENDÊN TENDURISTIYÊ
Îlham Ehmed bi dewamî li ser êrişan ev agahî dan:
“Piştî bombardûmana zêdeyî 12 saetan, fraksiyonên artêşa Sûriyeyê 7’ê Çileyê saet di 21:00 de bi koordîneyî li hemberî taxên Kurdan dest bi êrişê kirin û ji sê aliyan ve bi pêş ve çûn.
Di 8’ê Çileyê de Nexweşxaneya Osman a li Eşrefiyê û nexweşxaneya Xalid Fecir a li Şêxmeqsûdê gelek caran hatin bombekirin ku hingî sivîlên birîndar, nexweş û personelên tenduristiyê tê de bûn. Gelek xebatkarên tenduristiyê hatin kuştin.
DAGIRKIRINA EŞREFIYÊ Û ÊRIŞÊN LI ŞÊXMEQSÛD
Di navbera 9 û 10’ê Çileyê de Eşrefiyê tax bi temamî dagir kirin. Operasyonên leşkerî piştre li ser Şêxmeqsûdê hatin girankirin. Birîndar, zarok, extiyar li gel malbatên xwe li Nexweşxaneya Xalif Fecir asê man. Bombardûman bû sedem ku gelek sivîl û personelên tenduristiyê bimirin.
AGIRBEST Û VEGUHESTINA JI NEÇARÎ
Êvara 10’ê Çileyê piştî lihevkirina bi navbeynkariay aktorên navneteweyî sibeha 11’ê Çileyê agirbest kete meriyetê. Bi lihevkirinê re karê veguhestina mirî, birîndar û hêzên ewlekariyê yên mayî hêsan kir. Piştre şer qediya û Hêzên Ewlekariya Hundirîn xwe ji taxê vekişandin.”
FELAKETA MIROVÎ
Li gorî qeydên îdarî yên xwecihî û belgeyên hîn temam nebûne di navbera 6-10’ê Çileyê de di êriaşn de, jin û zarok, extiyar jî di nav de 47 sivîl hatin qetilkirin, 133 sivîl birîndar bûn. Herî kêm 276 sivîl winda bûn, ku piraniya wan bi kefî hatin binçavkirin.
Piştî êrişan koçberiyeke girseyî destpê kir û li gorî texmînan ji 148 hezar heta bi 155 hezar Kurd ên sivîl bi zorê ji taxên Kurdan ên Helebê hatin koçberkirin.
Îlham Ehmed got, “Civaka navneteweyî ji bo kontrolkirina agirbestê û pêşîgirtina li binpêkirinên hîn zêdetir divê bi lez çavdêrên serbixwe wezîfedar bike.”
