Yekîtiya Ewropayê (YE), yê ku berê Şera û HTŞ’ê xistibû lîsteya terorê, piştî têk çûna rejîma Esad ji lîsteya terorê derxist û destek da ku li Sûriyeyê ‘dewletek otorîter’ bê avakirin. Rayedarên YE’yê di demeke ku Şera û HTŞ’ê êrîşê Kurdan dikin de serdana Şamê kirin û piştgiriya siyasî û darayî pêşkêş kirin, Di serdana Seroka Komîsyona Ewropayê Ursula von der Leyen û Serokê Konseya YE’yê Antonio Costa de, ku wê demê êrîşên li ser taxên Kurdan ên li Helebê bi dijwarî berdewam dikirin, YE soz da ku 620 mîlyon euro piştgirî bide rêveberiya Şera. Rayedarên YE’ê pirsên derbarê êrîşên qirkirin û sûcên şer de bêbersiv hiştin.
Li dijî vê raya giştî ya demokratîk a li Ewropayê li dijî êrîşên YE û HTŞ’ê ku bi koordînasyona dewleta Tirk tevdigere, nerazîbûn nîşan dan. Siyasetmedarên Ewropayê ku banga hevgirtinê bi Rojava re kirin, nêrînên xwe wiha anîn ziman:
MARTIN SCHIRDEWAN: PEREYÊN GELÊN EWROPAYÊ ŞERÊ LI DIJÎ KURDAN FÎNANSE DIKE
Martin Schirdewan, MEP, li Parlamenta Ewropayê Hevserokê Koma Çep e (The Left) û DIE LINKE Elmanya Schirdewan, got ku nayê qebûlkirin ku rayedarên YE’yê fonên giştî yên Ewropayê ji bo hikûmeta veguhêz a ku li dijî Kurdan şer dike raber bike û daxwaza rawestandina tavilê ya şer kir û banga hevgirtina bi Rojava re kir.
ANDREAS SCHIEDER: EM BI TUNDÎ ROLÊ TIRKIYÊ REXNE DIKIN
Andreas Schieder, Parlamenterê PE, Îtîfaqa Pêşverû ya Sosyalîst û Demokratan (S&D), SPO Awusturya,
Schieder, bal kişand ser zêdebûna tundî û êrîşên li dijî Kurdan û diyar kir ku hikûmeta veguhêz a Sûriyeyê li şûna lihevhatinê, zext hilbijartiye û bi tundî rexne li rola Tirkiyeyê kir.
JONAS SJOSTEDT: BÊDENGÎ NE BÊALÎBÛNE HEVKARIYA SÛC E
Jonas Sjostedt, Parlamenterê PE, Koma Çep a Parlamenta Ewropayê – GUE/NGL, Vänsterpartiet Swêdê,
Jonas Sjostedt got, “Rewşa dawî ya li Sûriyeyê fikarên mezin çêdikin. Hikûmeta Îslamî li dijî Kurdan şer dike. Kurdan neçar dikin mîna her carê parastina xwe bikin.”
Sjostedt, bi bîr xist ku Kurd di şerê li dijî DAÎŞ’ê û El Qaîdeyê de pêşengî kirine û got, “Di vê rewşê de, divê civaka navneteweyî bi awayekî zelal diyar bike ku binpêkirinên mafên kêmneteweyan qet nayên qebûlkirin. Mafê Elewî, Durzî, Xiristiyan û Kurdan heye ku li Heleb, Rojava û li seranserê Sûriyeyê bi azadî û bi rûmet bijîn.
Sjostedt, bêdengiya civaka navneteweyî ya li hember êrîşên ku Kurd niha pê re rû bi rû dimînin wekî hevkariya sûc bi nav kir.
EVÎN INCIR: NABE KU YE’YÊ LI BER VÊ KOMKUJIYÊ BÊDENG BIMÎNE
Evîn Incir, Parlamentera PE, Tîfaqa Pêşverû ya Sosyalîst û Demokratan (S&D), Partiya Sosyal Demokrat a Swêdê, Evîn Incir, diyar kir ku çeteyên ji hêla Tirkiyeyê ve têne destekirin li dijî Kurdan sûcên şer dikin û got ku dayîna piştgiriya darayî ya bê şert û merc a YE’yê ji bo Şamê rewşek xeternak e û got divê gavên bilez ji bo agirbestê werin avêtin.
BRANDO BENIFEI: KURD JI BO HEVSENGIYA HÊZÊ TÊN QURBANKIRIN
Brando Benifei, Parlamenterê PE, Îtîfaqa Pêşverû ya Sosyalîst û Demokratan (S&D), PD Îtalya:
Benifei jî got, “Piştî êrîşên li dijî Durzî û Elewiyan vê carê Kurd rastî êrîşên giran tên. Ev yek nîşaneya wê yekê ye ku rêveçûna Sûriye ya piştî têkçûna Esad bi pêşengiya Ehmad El Şera û Tirkiyeyê çiqas xeternak bûye.”
Benifei, destnîşan kir ku Kurd li dijî DAÎŞ’ê hevalbendên welatên Rojava bûn, lê îro ji bo hevsengiyên nû yên herêmî tên qurbankirin.
OZLEM ALEV DEMÎREL: DESTÊ XWE JI SER ROJAVA BIKIŞÎNIN
Ozlem Alev Demîrel, Parlamentera PE, Koma Çep a Parlamenta Ewropayê – GUE/NGL, DIE LINKE Elmanya, Ozlem Alev Demîrel jî wiha got, “Divê civaka navneteweyî niha bikeve nava liv û tevgerê. Divê hikûmeta El-Şera heta maf û ewlehiya Kurd, Elewî, Durzî û yên din misoger neke neyê fînansekirin. Sûriye dewletek pir-etnîkî ye. Kurdên ku li dijî DAÎŞ’ê şer kirin û ji bo Sûriyeyek yekgirtî ya li ser bingeha xwerêveberiyê parêzvanî kirin, heq dikin ku mafên wekhev, nasname û parastinê bidest bixin.”
PER CLAUSEN: EV DIŞIBIHE HEWLDANÊN PAQIJKIRINA ETNÎKÎ
Per Clausen, Parlamenterê PE, Koma Çep a Parlamenta Ewropayê – GUE/NGL, Enhedslisten Danîmark, Per Clausen jî wiha got, “Pir girîng e ku civaka navneteweyî – tevî Yekîtiya Ewropayê – bi awayekî zelal diyar bike ku binpêkirinên mafên kêmneteweyan nayên qebûlkirin. Çi Elewî, çi Durzî, çi Xiristiyan, çi Kurd, çi jî her kêmneteweyek din, mafê wan heye ku li seranserê Sûriyeyê bi azadî û bi rûmet bijîn.
HEVSEROKÊN DIE LINKE: ROJAVA RONAHIYA HÊVIYÊ YE, HEWL TÊ DAYÎN BÊ TINEKIRIN
Hevserokên Die Linke (Partiya Çep) Ines Schwerdtner û Jan van Aken û Berdevka Polîtîkaya Derve Cansu Ozdemîr li Berlîn, Elmanya, Hevserokên Die Linke diyar kirin ku Rojava ji her demê bêhtir di bin gefê de ye û got ku sîstema azadîxwaz û pir-etnîkî ya Rojava tê hedefgirtin.
Hevserokan gotin, “Em bang li Hikûmeta Federal dikin ku êrîşên Tirkiye û Sûriyeyê yên li ser herêma Rojava bi tundî şermezar bike. Divê serdana fermî ya El-Şera ya Elmanya bi fermî were betalkirin. Di bin van şert û mercan de, normalîzekirina têkiliyên di navbera Elmanya û Sûriyeyê de çênabe. Her wiha em daxwaz dikin ku NY civînek taybet li ser rewşa Sûriyeyê li dar bixe.”
PANOT: DIVÊ ROJAVA BÊ PARASTIN
Seroka Koma La France Insoumise ya li Parlementê Mathilde Panot, diyar kir ku Fransa nikare li hember êrîşên Îslamîst ên ku ji hêla Tirkiyeyê ve têne destekirin bêdeng bimîne û banga parastina çalak a modela Rojava kir.
PETRA BAYR: HETA AKTORÊN KURD NEYÊN TEVLÎ KIRIN ARAMÎ ÇÊNABE
Petra Bayr endama Encumena Neteweyî ya Awusturya û berdevka SPO’yê ji bo siyaseta derve û geşedana cîhanî.
Petra Beyr got, “Li Bakur û Rojhilatê Sûriyeyê, Kurd bi zordarî, pevçûn û koçberiyeke dijwar re rû bi rû ne. Hikûmeta Veguhêz a Sûriyeyê ku ji hêla Tirkiyê ve tê rêvebirin, rêveberiya xweser a demokratîk li Rojava hedef digire. Li dijî vê civaka navneteweyî bi piranî bêdeng dimîne. Bêyî tevlîbûna Kurdan di pêvajoyê de û bêyî parastina mafên sivîl û kêmneteweyan, aramiya mayînde li Sûriyeyê û herêmê ne mumkin e; avahiya demokratîk a pir-etnîkî li Rojava divê ji bo berjewendiyên jeopolîtîk neyê qurbanîkirin.”
FABIAN MOLINA: HEVKARÎ BERPIRSIYARIYEK SIYASÎ YE
Parlamenterê Partiya Sosyal Demokrat a Swîsreyê Fabian Molina, da zanîn ku hevgirtina bi gelê Kurd û hemû kêmneteweyan re berpirsiyariyek siyasî ye û bang kir ku li dijî binpêkirinên qanûnên navneteweyî gavên berbiçav werin avêtin.
