Kongreya Îslama Demokratîk îro bi amadebûna oldar, mela û endamên kongreyê daxuyaniyek da.
Daxuyanî ji hêla rêveberê Kongreya Îslama Demokratîk şêx Hogir Mihemed Hisên ve hate xwendin.
Hate destnîşankirin ku bikaranîna olê ji bo rewakirina êrişên leşkerî, xetereyeke mezin e li ser yekitiya civakê. Di daxuyaniyê de daxuyaniyên Wezareta Weqfên Olî ya hikumeta demkî hatin rexnekirin ku di wan de hin dever wek “herêmên fetihkirî” hatibûn binavkirin. Di daxuyaniyê de her wiha ji miftiyê komarê şêx Usame El Rifai û oldarên Şamê hat xwestin ku li kêleka rastiyê bisekinin û mafên rewa yên gelê Kurd ên ziman, nasname, çand û axê biparêzin.
Di daxuyaniyê de her wiha hat destnîşankirin ku Îslama rastîn banga xwişk-biratî, jiyana hevbeş û aştiyê dike û hat diyarkirin ku nasnameya Kurdî beşeke wê ya resen e.
Kongreya Îslama Demokratîk di dawiya daxuyaniya xwe de diyar kir ku xweparastin li gorî regezên Îslamî mafek rewa ye.
