Şervanên QSD, YPJ û YPG’ê ku bi rojan e ji bo kêliyekê jî ji eniyê neçûne, di her firsendê de biryardariya xwe ya ji bo têkoşînê tînin ziman.
Şervanê YPG’ê Azad Hesekê li eniya berxwedanê axivî û got, “Em gundên bejahî yên Hesekê û parastina gelê xwe yê Kurd, gelên Ereb, Suryan û Asûrî dikin. Li hemberî me êriş û komployeke mezin hate kirin. Em gundên Hesekê diparêzin. Di van êrişan de metirsiya komkujiyeke mezin heye. Moralê gelê me û şervanên me yên YPJ û YPG’ê di cih de ye. Di nava gelê me de ruhekî seferberiyê afirî.” Azad Hesekê destnîşan kir ku ji bo parastina rûmeta mirovahiyê, bajar û çanda xwe, gelê wan jî bi wan re ye.
Azad Hesekê bi dewamî got, “Şerekî bê exlaq tê meşandin. Talankirina malên Kurdan, dizî, helaldîtina malên Kurdan, fetwayên weke dema Enfalê. Yên ku van fetwayan didin jî qaşo ji xwe re dibêjin wezareta dewletê ye. Mal, can û xwîna Kurdên li nava sînorên vê dewletê li xwe helal û weke xenîmetê dibînin û fetwayê didin.
Bendewariya me ji gelê me ew e ku li ser piyan bimîne, moral û motîvasyona xwe bilind bike. Em bi tenê nînin. Gelê me bi me re ye. Li çar parçeyên Kurdistanê, gelê me yê li Başûr, Bakur û Rojhilat û dostên me yên li Ewropayê bi me re ne. Em bêhêz û bêtecrûbe nînin. Em ne mirovên welê ne ku dilê mirovan li ser bişewite, ku hinek alîkariya me bike. Bila gelê me bi me re be ew besî me ye. Em wekî din kesî naxwazin. Em bêhêz nînin. Hêza me gelê me ye, hêza me hevalên me ye.
Li ser vê bingehê em berxwedana gelê xwe silav dikin. Em ê tola hevalên xwe yên şehîd li erdê nehêlin. Ji hevalên xwe yên birîndar re şîfa lezgîn dixwazin. Bila gelê me serbilind be, serketin a me ye. An serketin an serketin.”
