Di metna kampanyayê de hate ragihandin ku gelê Kurd li Sûriyeyê bi dehan sal in li polîtîkayên bênasnamehiştin û înkarê rast tê, ji mafên xwe yên çandî û sivîl ên bingehîn bêpar têne hiştin. Hate destnîşankirin ku ev rewş dibe sedem ku krîz û nearamiya li welêt kûrtir bibe.
Di daxuyaniyê de hate bibîrxistin ku di pêvajoya şer a li Sûriyeyê de Kurdan ji bo parastina sivîlan û dewamiya aştiya civakî bi roleke girîng rabûn, lê belê li gel vê yekê jî statuya wan a hiqûqî û siyasî di belgeyên navneteweyî de nehate bicihkirin. Hate gotin, bi taybetî rola dîrokî ya jinên Kurd a li dijî rêxistinên terorê û parastina civakê ji nedîtî ve hatiye.
Yekîtiya Jinên Kurd bang li Neteweyên Yekbûyî (NY) kir piştgiriyê bide “Misogerkirina mafên çandî, siyasî û neteweyî yên gelê Kurd bi destûra bingehîn, çareseriyeke nenavendî û demokratîk.” Her wiha hate xwestin ku dawî li binpêkirina mafên mirovan ên li herêmên Kurdan, guhertina demografîk û zextan bê anîn.
Di metnê de bang li NY’ê û Konseya Ewlekariyê hate kirin ku ji bo parastina sivîlan bi lez bikevin nava liv û tevgerê, alîkariyên mirovî bi rengekî ewle û bêastengî bigihîne herêmê, li gorî pêwîstiyê çavdêrên navneteweyî yan jî hêza aştiyê bişîne herêmê.
Yekîtiya Jinên Kurd destnîşan kir ku jinedîtîhatina meseleya Kurd ne tenê mafên gelê Kurd wê li ser avakirina Sûriyeyeke yekbûyî ya li ser bingeha aştî û edaletê gefek be.
