Meclisa Malbatên Şehîdan a bajarê Hesekê merasîma cenaze ya endamê Hêzên Ewlekariya Hundirîn Mihemed Mihemed li Pakrewangeha Şehîd Dijwar a gundê Dawûdiyê li dar xist. Di merasîmê de şervanên QSD’ê Mûeyed El Seîd, Qasim El Efrûx, Ehmed Haco, Abdullah El Namis û endamê Hêzên Ewlekariya Hundirîn Hisên Ebdo yên ku di dem û cihên cuda de şehîd bûne jî hatin bibîranîn.
Merasîm bi tevlêbûna malbatên şehîdan, şêniyên bajar û gundewarên wê, endamên sazî û partiyan, bi deqeyeke rêzgirtinê dest pê kir. Piştre endama Meclisa Jinan a Meclisa Malbatên Şehîdan Necah Qewas axivî. Necah sersaxî ji malbatên şehîdan re xwest û got: “Şehîd rûpelên ronî di dîroka neteweyan de ne. Şehîd ne tenê navên di rûpelan de ne, lê di rêya siberojeke ronak a ji bo welatê xwe de canê xwe dan.”
Endamê Meclisa Leşkerî ya Kantona Cizîrê Dêrsim Hesekê jî di axaftina xwe de şehîdên azadiyê bi bîr anîn û got bi saya keda şehîdan gel bi ziman û nasnameya xwe dijîn. Her wiha destnîşan kir ku dê heya kêliya dawîn têkoşîna azadî û rûmetê bidomînin û kes nikare îradeya gelê azadîxwaz bişikîne.
Dêrsim Hesekê di dewama axaftina xwe de anî ziman ku gel berdêlên giran dane, ji ber ku dizane qelenê azadiyê giran e. Her wiha bi bîr xist ku pêvajoya heyî ya şerê gel ê şoreşgerî peyamek da dewletên mezin û xayînan ku dê xiyanet têk biçe û gelê rêya jiyaneke azad û bi rûmet hilbijartiye dê bimîne.
Piştî axaftinan endama Meclisa Malbatên Şehîdan Êva Ebdo nasnameyên şehîdan xwendin û radestî malbatên wan kirin.
Di dawiyê de cenazeyê şehîd Mihemed Mihemed li Pakrewangeha Şehîd Dijwar bi dirûşman spartin axê.
