Endamê Desteya Rêveber a Partiya Jiyana Azad a Kurdistanê (PJAK) Ehwen Çiyako di civîna çapemeniyê de ya ku partiyên siyasî yên li Rojhilatê Kurdistanê yekîtiya xwe têde ragihandin û Tifaqa Hêzên Siyasî yên Kurdistana Îranê têde damezrandina xwe ragihandin, cih girt. Çiyako ji ANF’ê re axivî.
Ehwen Çiyako anî ziman ku tifaq bersiveke daxwazên gelên Rojhilatê Kurdistanê û gelê Kurd e û encameke hevdîtinên nêzî 8 meh in navbera hêzên siyasî û partiyên li Kurdistanê didome ye. Çiyako got, “PJAK ji roja ewilî ya damezrandina xwe û vir ve ji bo avakirina yekîtiya navbera hêzên siyasî û partiyên li Rojhilatê Kurdistanê hewldan raber kir. Lewma ji bo avakirina zemîneke diyalog û muzakereyan bi roleke bi bandor rabûye.”
Ehwen Çiyako diyar kir ku îlankirina tifaqê di salvegera 27’an a komploya navneteweyî ya li hemberî Rêber Apo de piştgiriyeke eşkere ya ji bo Rêber Apo ye û ev tişt destnîşan kir: “Ev tifaq îşareteke eşkere ya piştgiriya gelê Kurd a ji bo şehîdên ku sala 1999’an ji aliyê rejîma Îranê ve hatine qetilkirin e. Wateya vê tifaqê ji bo Rojhilatê Kurdistanê kûr û bi kok e.”
Ehwen Çiyako di serî de ciwan û jin bang li gelê Kurd û hemû beşên civakê kir ku ji bo yekîtiyê bixebitin û têkoşîna li vê qadê mezin bikin.
‘EZ ROJA YEKÎTIYÊ YA GELÊ KURD PÎROZ DIKIM’
Ehwen Çiyako bal kişand ser girîngiya dîroka 22’yê Sibata 1999’an, roja yekîtiyê ya gelê Kurd pîroz kir û ev tişt got:
“22’yê Sibatê civîneke 5 partiyên siyasî yên li Rojhilatê Kurdistanê xebat dimeşînin, hate lidarxistin û di encama vê civînê de tifaqek hate îlankirin. Bê guman ev civîneke pir girîng bû. 22 Sibat jî rojeke welê bû ku xelkê Rojhilatê Kurdistanê li dijî komploya li hemberî Rêberê gelê Kurd Apo hatî kirin, rabû serhildanê û di vê rojê de Komara Îslamê ya Îranê li dijî xelkê Rojhilatê Kurdistanê qirkirin da destpêkirin. Me bi dehan şehîd dan; bi taybetî li bajarê Sine ev bi hemû tundiya xwe hate hîskirin.
Piştî 27 salan heman rojê li Rojhilatê Kurdistanê Tifaqa Hêzên Siyasî yên Kurdistana Îranê hate îlankirin. Ev mijara ku xwedî wateyeke kûr e, di heman demê de tê wateya zindîkirina ruhê şehîdan. Di şexsê malbatên şehîdên 22’yê Sibatê û yên ku 22’yê Sibatê hatine girtin û êşkence dîtine de, ez vê tifaqê pîroz dikim. Ez hemû gelê Kurd û gelên Rojhilatê Kurdistanê pîroz dikim.”
‘ENCEX BI YEKÎTIYÊ EM DIKARIN JI PÊVAJOYÊN ZEHMET RE BIBIN BERSIV’
Ehwen Çiyako wisa dewam kir: “Civîna ku 22’yê Sibatê hatî kirin, têkildarî avakirina platformeke ji bo tifaqê encameke nîqaşên zêdeyî 8 mehan bû. Hemû aliyan bawer dikir ku encex em bi yekîtiyê dikarin ji zehmetiyên xelkê Rojhilatê Kurdistanê re bibin bersiv. Her 5 partî jî tevlîbûneke di asteke bilind de ji civînê re çêkirin. Ez dikarim bêjim ku di civînê de ruhê yekîtiyê hebû û piştre bi kêfxweşî hate pêşwazîkirin.
Di serî de Rojhilatê Kurdistanê gelê Kurd ê li 4 parçeyên Kurdistanê, ev demek dirêje ji hêzên Rojhilatê Kurdistanê dixwaze bibin yek û tifaqê ava bikin. Li seranserî Îranê jî nerazîbûnên mezin hebûn; gelek partiyan ev yek weke mînakek pênase kirin. Parçeyên din ên li Îranê jî divê Kurdan ji xwe re mînak bigirin û bi baweriyeke tam û tevî cudahiyên siyasî hêzên xwe bikin yek.”
‘PJAK DI VAN DIYALOGAN DE BI ROLEKE MEZIN RABÛ’
Ehwen Çiyako îşaret bi rola PJAK’ê ya di pêvajoya tifaqê de kir û ev tişt got, “Her kes dizane ku PJAK ji roja ewilî ya damezrandina xwe û vir ve ji bo avakirina yekîtiya navbera hêzên li Rojhilatê Kurdistanê hewl dide. Tenê yekîtiya partiyên siyasî têrker nîne, di asta neteweyî de jî yekîtî şert e. PJAK’ê di şoreşa ‘Jin Jiyan Azadî’ ya sala 2022’yan de pratîk û biryardariya xwe kûr kir. Konferansên cur be cur hatin lidarxistin ku ji Îran û Rojhilatê Kurdistanê gelek partî lê civiyan û PJAK’ê ji vê re pêşengî kir. Bi hewldana aliyên din re PJAK ji bo ev diyalog bigihijin encamekê bi roleke mezin rabû. Tifaq xebat û bernameya xwe di çarçoveya yekîtiya neteweyî ya li Rojhilatê Kurdistanê de ava dike.”
‘ROJHILAT JI BO KURDISTANÊ HÊZEKE YEKGIRTÎ YA NETEWEYÎ YE’
Ehwen Çiyako îşaret bi sê biryarên tifaqê kir û destnîşan kir ku ev biryar ji bo parastina yekîtiya Kurdan pir girîng in û ji bo bicihanîna van divê hinek navend û rêxistin bên avakirin. Ehwen Çiyako di dewamê de ev tişt anî ziman: “Yek ji van biryaran ew e ku rêveberî û navendeke tifaqê hebe. Ev rêveberî divê ji hemû endamên tifaqê pêk were. Piştre divê komîteyeke dîplomasiyê were avakirin ku rewşa gelê Kurd a li Rojhilatê Kurdistanê îfade bike. Ji bo asta Îran, navneteweyî û herêmî xaleke din a girîng jî avakirina komîteya leşkerî ya paye bilind a hêzên gerîla û pêşmerge ye. Bê guman ev mijar di siberojê de ji bo avakirina hêzeke yekgirtî ya neteweyî ya li Rojhilatê Kurdistanê dikare bibe destpêkek.”
‘TI KES NIKARE HEQÎQETA KURD ÎNKAR BIKE’
Ehwen Çiyako destnîşan kir ku yekîtiya gelê Kurd îro bûye wesîle ku Kurd ji aliyê hemû cîhanê ve bên naskirin û wiha got, “Rewşa gelê Kurd ê li Rojhilatê Kurdistanê zêde ji rewşa gelê li parçeyên din cuda nîne. Ti kes nikare heqîqeta Kurdan înkar bike. Kurd li Rojhilata Navîn xwedî giraniyekê ne û xwedî yekîtiya neteweyî ne. Di vê pêvajoya borî de me dît ku hemû Kurd ji bo Rojava hatin ba hev û gef ji holê rakirin. Ev hêza neteweyî bê guman ji bo Rojhilatê Kurdistanê jî piştgiriyeke mezin e. Vê tifaqê kir ku parçeyên din ji bo Rojhilatê Kurdistanê piştgiriyeke mezin pêşkêş bikin. Pirsgirêka Kurd a li Rojhilata Navîn û rewşa vê ya di asta navneteweyî de, di pêvajoyeke wiha de ku Îran rû bi rûyê guhertinên mezin e, ji bo Rojhilatê Kurdistanê jî firsendeke mezin ava kir.”
‘HER KES DIVÊ PIŞTGIRÎ BIDE VÊ TIFAQ Û YEKÎTIYÊ’
Ehwen Çiyako bang li hemû partiyên li Rojhilatê Kurdistanê kir ku di vê tifaqê de cih bigirin û bang li ciwanan jî kir ku berpirsyariyên xwe yên neteweyî bi cih bînin: “Em ji aliyên tevlî tifaqê bûne dixwazin ku hêz bidin tifaqê û pêş bixin. Bendewariya me ji aliyên di tifaqê de cih nagirin jî ew e ku tevlî tifaqê bibin û ji bo xurtkirina tifaqê bi roleke bi bandor rabûn. Tişta em ji gelê xwe dixwazin jî ew e ku piştgirî bidin vê tifaq û yekîtiyê.
Bi taybetî em ji ciwanên li Rojhilatê Kurdistanê dixwazin ku ruhê neteweyî derxin pêş û piştgirî bidin şoreşa me. Ciwanan li seranserî cîhanê guhertinên mezin ava kirine. Ciwanên Rojhilatê Kurdistanê xwedî potansiyeleke mezin in. Dewletê jî her tim xwestiye vê potansiyelê tune bike. Weke PJAK ji bo xurtkirina Hêzên Parastinê yên Kurd em dixwazin ku ciwanên me hîn zêdetir PJAK û gerîla nas bikin.”
‘DIVÊ EM YEKÎTIYA XWE XURT BIKIN’
Ehwen Çiyako bang li her kesê kir ku hîn zêdetir xwe rêxistin bikin û enerjiya xwe bidin xizmeta şoreşê û got, “Azadî nêz e. Geşedan nîşanî me didin ku Rojhilatê Kurdistanê li ber qonaxa azadiyê ye. Divê em hemû baldar bin, yekîtiya xwe xurt bikin, hêza xwe hîn baştir rêxistin bikin û hemû enerjiya xwe bidin xizmeta şoreşê. Gelê Kurd xwedî potansiyeleke mezin e. Em ê hewl bidin vê potansiyel û enerjiyê veguherînin hêza serketinê.”
