Navenda Ragihandin û Çapemeniyê ya HPG’ê, bi daxuyaniyekê Hefteya Qehremaniya Neteweyî pîroz kir.
Daxuyaniya HPG’ê bi vî rengî ye:
“Em gelê xwe û dostên gelê xwe yên ji heft salî heya heftê salî berê xwe dan qadan û Newroz bi ruhê berxwedanê pêşwazî kirin, bi coşeke mezin pîroz kirin, rastiya gelê Kurd a berxwedêriyê nîşanî hemû cîhanê dan, yekîtiya neteweyî nîşan dan, disozî, hesret û daxwaza azadiya ji bo Rêber Apo bi awayê herî xurt qîr kirin bi dil û can silav dikin û Cejna Newrozê li wan pîroz dikin.
Hevrê Mazlûm Dogan ê Kawayê hemdem, li dijî êşkenceyên dermirovî yên li Zindana Amedê di 21’ê Adara 1982’yan de şeveke Newrozê berxwedaniyeke mezin nîşan da û çalakiyeke lehengiyê ya mezin li dar xist. Hişmendî, biryardariya şoreşgerî, kesayeta xurt, hevrêtiya heqîqî û çalakiya wî ya Newrozê ya hevrê Mazlûm Dogan ê kadroyê pêşeng ê Tevgera Apoyî, ew kiriye haveynê hişmendiya têkoşîna me, ruhê berxwedanê, xet û nasnameya wê. Ruhê berxwedana Newrozê yê Mazlûm Dogan nasname, hişmendiya neteweyî û xîreta têkoşînê daye gelê Kurd, çirûska ku bi sê niftikan vêxist roja îroyîn veguheriye agirê azadiyê yê ji aliyê milyonan însanan ve tê geşkirin. Ger roja îroyîn bi rastî jî Newroz li gorî wate, têkiliya xwe ya dîrokî û cewhera xwe tên pêşwazîkirin û kelecan, coş û ruhekî dide gelê me û ya herî girîng jî ger gav bi gav azadiyê bi xwe re bîne ev yek bi saya lehengiya Mazlûm Doganan e.
Fermandarê efsanevî yê Gerîlayên Azadiya Kurdistanê hevrê Mahsûm Korkmaz, weke yek ji hevrêyên Mazlûm Dogan ê herî dilsoz xeta berxwedana PKK’ê ya li Zindana Amedê gihandiye çiyayên Kurdistanê. Fermandar Egîd, li çiyayên Kurdistanê gerîlatî daye destpêkirin, fermana înkar û tunehesibandina gelê Kurd qetandiye, Pêngava 15’ê Tebaxê ya Gewre pêk aniye û dengê berxwedêrên Apoyî li seranserê cîhanê daye bihîstin. Sekna lehengiyê ya hevrê Egîd, şerê hebûnê yê gelê Kurd ê ku dihat xwestin ku were tunekirin, kiriye û ji tunebûnê ber bi vejînê ve biriye. Mîrateya ku Fermandar Egîd ê ku li Kurdistanê ji pêdiviya pêşxistina têkoşîna gerîlayan bawer kir û pêşengtiya vê têkoşînê kir û ji me hişt, li Kurdistanê rastiya civaka ji bo azadiya xwe şer dike, derxist holê û bi deh hezaran ciwanên şopdarên Egîd bi baweriya serkeftina vê têkoşînê tevlî têkoşînê bûne. Apoyîyan ruh û xeta berxwedana li Zindana Amedê veguherandin terzê gerîlatiyê û li gel bedêlên mezin têkoşîneke ku nîvsedsalê berdewam kir, dane meşandin û bi hezaran leheng afirandin.Helwesta bi disîplîn, wêrek û bi biryar a hevrê Egîd di xeta Rêber Apo de, di serketina berxwedanê de roleke girîng lîst. Ev sekn bi herêmekê ve sînordar nebû; bandor li seranserê Kurdistanê û li her deverê ku Kurd lê dijiyan kir. Helwest û ruhê qehremaniyê yê hevrê Egîd ji bo azadiya gel bû hêzek xurt. Ji ber vê yekê, ew ê her tim wekî lehengek were bîranîn.
Gelê Kurd ê welatparêz di navbera 21’ê Adarê û 28’ê Adarê de roja ku hevrê Mazlûm Dogan çalakiya xwe ya qehremaniyê pêk anî û roja ku hevrê Mahsûm Korkmaz di 28’ê Adara 1986’an de li Gabarê şehîd bû wek Hefteya Qehremaniya Neteweyî pîroz dike. Hevrê Mazlûm û Mahsûm nirxên birûmet in ku dîroka qehremaniya hemdem a gelê me dane destpêkirin, wekî kesayetên sosyalîst û birûmet ku hişmendî, wêrekî û îradeya Apoyî herî bi hêz tê de cih digire. Hevrê Mazlûm û Mahsûm ku navên xwe di dîroka Kurdistanê de wek lehengên mezin, sembolên ruhê azadiyê, şoreşgerî û qehremanên bêhempa nivîsandine, çawa ku bi dehan salan e weke meşaleyên têkoşîna azadiya neteweyî ya gelê me tu carî venamirin, îro jî rêya me ronî dikin. Li ser vê bingehê em Hefteya Qehremaniyê ya gelê xwe yê welatparêz ê Kurd û hemû hevrêyên xwe ku bi ruhê Apoyî yê fedaî di her qadê de têkoşîna xwe dimeşînin, pîroz dikin. Em hemû şehîdên xwe, bi taybetî jî qehremanên xwe yên neteweyî, bi hurmetî, hezkirin û minetdarî bi bîr tînin. Em diyar dikin ku em ê di bin her şert û mercî de bi biryardarî şopdarê rêya şehîdên xwe bin.
Weke Gerîlayên Azadiya Kurdistanê îro em bi hişmendiya Mazlûman û ruhê Mahsûman ji bo parastina erkên xwe yên li ser xeta Apoyî, têkoşîna xwe berdewam dikin. Bi têgihîştina ku layiqê şehîdan bin, li ser şopa lehengan bimeşin û bi ruhê fedaîbûnê û rêbazên dewlemend hîn bi hêztir têbikoş in, biryardariya xwe ya ji bo misogerkirina azadiya fîzîkî ya Rêber Apo tînin ziman.”
Em gelê Kurd ku bi biryardarî li ser şopa qehremanên xwe dimeşin, bi hêzek mezin Cejna Newrozê pîroz dikin û qehremanên xwe bi hurmetî bi bîr tînin, silav dikin. Em careke din Cejna Newrozê û Hefteya Qehremaniyê li gelê xwe yê welatparêz û hevrêyên xwe pîroz dikin û di têkoşîna wan a azadiyê de serketinê ji wan re dixwazin.”
