Mehmet Edîp Taşar ku yek ji girtiyên nexweş bû û tevî serlêdanan jî nehate berdan, di 24’ê Adarê de li Nexweşxaneya Bajar a Çam ve Sakurayê jiyana xwe ji dest da. Ji bo Taşar, li Taxa Tilmerê ya Êlihê şîn hate danîn. Şîna Taşar, ji hêla TUAY-DER, MEBYA-DER, nûnerên partiyên siyasî, rêxistinên civaka sivîl û gelek welatiyan ve bi girseyî hate ziyaretkirin.
Hevserokê TUAY-DER’ê Hasan Arigtekîn di şînê de got: “Şehîdên me dê her dem di dil û bîra me de bin. Ji Kawayên Hesinkar heta Mazlum Doganan, vî gelî gelek bedelên giran da. Heke em îro gihiştibin van rojan, ev encama têkoşîna wan e.”
Birayê Taşar, Mervan Taşar jî anî ziman ku her çend ji bo kekê xwe xemgîn be jî ewqas jî serbilind e. Taşar, got: “Şehîd ne tenê şehîdê malbata me ye. Şehîdê hemû Kurdan û Kurdistanê ye.”
