Rêber Apo di daxuyaniyên xwe yên têkildarî pêvajoya nû de bi israr destnîşan kir ku divê jin bibin pêşengên têkoşînê û serketina pêvajoyê jî bi têkoşîna jinan dibe. Tevgera jinên Kurd bi têkoşîn û tecrûbeya xwe ya salan a aştiyê ragihand ku ew ji vê pêvajoyê re amade ne.
Li nava tevgera jinê ya Tirkiyeyî têkoşîna aştiyê li gorî tevgera jinên Kurd hîn zehmet û tevlîhev xuya dike. Tevgera jinê ya Tirkiyeyê berê jî niha jî têkoşîneke xurt a ji bo aştiyê dimeşîne.
Ji Partiya Tevgera Kedê (EHP) Feyzanûr Yilmaz têkoşîna azadiyê ya tevgera jinên Tirkiyeyî, nêrîna li rastiya jinên Kurd û sekna li pêşberî dema nû ji ANF’ê re nirxand.
‘DI MIJARA CIVAKÎBÛNÊ DE TEVGERA JINÊ MÎNAKEK E BAŞ E’
Yilmaz destnîşan kir ku divê aştî civakî bibe, jinûve axaftina li ser aştiyê rewşeke erênî ye û got, “Weke tevgera jinê, tevgera jinê ya li Tirkiyeyê her tim bi têkoşîna aştiyê re di nav hev de bû. Mijara aştiyê timî nirxandiye, lê belê ji sala derbasbûyî û pê ve ji bo civakîbûnê nîqaş kir û hewl da mijarê binirîne. Mînak, Înîsiyatîfa Jinê ya Pêwîtiya Min bi Aştiyê Heye ava bû. Her wiha di 8’ê Adarê, di 25’ê Mijdarê de bi pankart û dirûşmên xwe aştî kir mijar. Di vir de serketî bû. Di mijara civakîbûnê de tevgera jinê di nava xwe de mînakeke baş e. Lewma civakîbûna têkoşîna azadiyê mînakek e. Bi dîtina min hewldana ji bo civakîbûna aştiyê girîng e. Dikarim bibêjim ku me ev pêvajo erênî nirxand. Ji ber ku jin baş zane bê şer bi xwe re çi tîne, çi hilweşînê tîne.”
‘PEJIRANDIA DIRÛŞMA JIN JIYAN AZADÎ MÎNAKEKE BAŞ E’
Yilmaz ragihand ku pêwîstî bi axaftina hîn bêhtir a li ser aştiyê û têkoşîna hevpar heye û got, “Divê ji bo avêtina gavên şênber bang bê kirin. Bidawîbûna şer, hatian aştiyê wê rê li ber wekheviyê ji bo jinê jî veke. Ne tenê ji bo jinan, wê rê li ber wekheviya civakê bi temamî û her kesî veke. Ne tenê ji bo jinan, ji bo her kesî, ji bo tevahiya civakê wê bê wateya wekheviyê. Ji ber vê jî em bi her awayî xwedî li vê pêvajoyê derdikevin.
Ji aliyê têkoşînê ve em ji xwe timî bi tevgera jinên Kurd re tevgeriyan. Me tevgera Jurd jî her tim pejirand. Ji ber vê jî weke min got, em aştiyê dipejirînin û dikarim bibêjim ku jê re amade ne. Jin di vê têkoşînê de li refên herî pêş e û her tim jî bi vî rengî bû. Em ji tevgera jinên Kurd gelek şêweyên têkoşînê hîn bûn. Bi dîtina min tevgera jinên Tirkiyeyî ji rûbirûbûnê re amade ne. Mînak, di dema nêz de dirûşma ‘Jin, Jiyan, Azadî’ hate pejirandin.”
‘JINÊN TIRKIYEYÎ YÎN BI RASTIYA JINÊN KURD RE RÛ BI RÛ NEBÛNE’
Yilmaz diyar kir ku piraniya jinên Tirkiyeyê bi bûyerên bi serê jinên Kurd ve hatine hîn rû bi rû nebûne, ev yek di nava têkoşînê de dikare ji holê bê rakirin û got, “Piraniya jinên Tirkiyeyê bi rastiya Kurdan re rû bi rû nebûne, ji ber ku li Tirkiyeyê tevgera neteweyî û netewetiya Tirk zêde ye. Mixabin pratîkeke neteweya serwer heye. Ji ber vê jî bêguman derdorek heye ku fêhm nake, lê belê em jinên di nava têkoşînê de ji xwe hewl didin vê ji holê rakin.”
