Weke her cejn û hilkefteke pîroz, îşev jî Şehîdgeha Şehîd Dilgeş û Şehîd Berxwedan bû rawestgeha sereke ya malbatên şehîdan. Dayik, bav û xizmên cangoriyan, bi hildana mûman li ber serê her şehîdekî, careke din soza şopandina rêya wan û parastina destkeftiyên wan nû kirin. Di nava atmosfereke bi wate û xemgîn de, malbatên şehîdan cejna hevdu pîroz kirin û mîrasa şehîdan wek ronahiya serê salê pênase kirin.
‘Di merasîma seredanê de, nûnerên saziyên Rêveberiya Xweser û Meclisa Gel jî amade bûn. Di axaftinên ku li şehîdgehê hatin kirin de, bal hat kişandin ser girîngiya azadiyê û rola şehîdan di parastina nasnameya Êzidxanê de. Hat destnîşankirin ku ev cejn di dîroka gelê Êzidî de destpêka jiyaneke nû ye û daxwaza herî mezin a îsal jî azadiya fîzîkî ya Rêber Apo û hemû girtiyên azadiyê ye.
Hate gotin ku Çarşema Serê Nîsanê ne tenê cejneke olî ye, di heman demê de sembola berxwedan û vejînê ye. Beşdaran hêvî kirin ku Tawisî Melek vê salê bike wesîleya rawestandina şer li cîhanê û pêkanîna aştiyeke mayînde.
Hevseroka Meclisa Gel a Şengalê Xoxê Dexîl di merasîmê de amade bû û got ‘’Ez vê cejnê di serî de li Rêber Apo û tevahiya malbatên cangoriyan pîroz dikim. Em bi hêvîne ku ev cejna Çarşema Serê Sala Êzidiyan bibe wesîleya azadiya Rêber Apo û tevahî girtiyên ku di zindanan de li ber xwe didin. Hêviya me serketin û azadî ye.”
Her wiha endama saziya Malbatên Şehîdan a Şengalê Pakîza Celal jî peyam da û got ‘’Cejna tevahiya civaka Êzidî pîroz be. Ez vê rojê li girtiyên di hebs û zindanan de, li Rêber Apo û li gerîlayên ku li serê çiyan têkoşînê dikin, pîroz dikim. Hêviya me ji Tawisî Melek e ku ev cejn bibe wesîleya azadiyê û bibe sedem ku şer li tevahiya cîhanê raweste û aramî pêk were.”
