Platforma Jinan a Demokratîk a Navneteweyî ya Jinan derbarê cezayê darvekirinê û zextên rejîma Îranê ya li ser gelên Îranê daxuyaniyek nivîskî belav kir.
Daxuyanî wiha ye:
“Di demekê de ku careke din agirê şer bi gelê Rojhilata Navîn dikeve û hêzên serdest ên cîhanê bi zimanê gef û bazarê çarenûsa gelan diyar dikin, divê em bi dengekî bilind bêjin, ev şer ne ji bo azadiya gelane, berovajî wê li dijî wane. Şer bi her şêweyî û bi her hincetê be, beriya her tiştî jiyana xelkê dike armanc û dibe amûrek ji bo wêrankirin û bêdengkirina dengên nerazî. Di vê rewşê de, dijberiya şer ne tenê bijardeyeke, pêdiviyeke exlaqî û siyasî ye.
Di nav vê aloziyê û bêewlehiyê de, ligel qeyranên herêmî û qutbûna peywendiya civakê bi cîhanê re, bi taybetî bi rêya qutkirina înternetê, pêla girtin, cezakirina giran û zêdebûna cezayê darvekirinê berdewame. Gotinên Hisên Muhsinî Ejêyî yên derbarê lezkirin û tundkirina biryarên darvekirinê de, nîşaneyeke zelal ya vîna desthilatdariyê ya ji bo afirandina tirs û kontrolê di rewşên qeyranê de. Ev rûdan, bîranînên tahl ên dîrokî tîne bîra mirov ku tê de bêdengkirin wek amûrekê ji bo mîsogerkirina mayîna desthilatê hatiye bikaranîn.
Îro di rewşekê de ku çavê cîhanê li ser şere, girtiyên siyasî û kesên ku hatine girtin, di nav bêdengiyê de, bi metrsiyeke mezin re rû bi rû ne. Ev bêdengî heger neyê şikandin, dikare bibe sedema karesatên mirovî yên din. Ji ber vê yekê, avakirin û bihêzkirina kampanya ‘Na ji darvekirinê re’ û bilindkirina dengê girtiyan, bûye pêdiviyeke lezgîn.
Ev deng ne tenê parastina li çend girtiyane, di heman demê de parastina li rûmeta mirovahiyê û mafê jiyanê ye. Di rewşekê de ku saziyên fermî û muxalefet bê bingeh nekarîne bibin hêzeke rastîn, ev çalakiyên civakî dikarin di dilê civakê de hêzeke resen û bibandor biafirînin, hêzeke ku ne bi hêzên derve ve girêdayî ye û ne jî di çarçoveya lîstikên siyasî yên sînordar de dimîne.
Ezmûna dîrokî nîşan daye ku desthilatdarî di dema qeyranan de, ji bo kontrolkirina civaka nerazî serî li bêdengkirineke mezin û afirandina tirsê dide. Îro jî di nav şer û gefan de, xema herî mezin a desthilatdariyê ne tenê dijminê derve ye, gele ku dikare dengê xwe veguherîne hêzeke civakî. Yek ji amûrên herî girîng ên vê kontrolê, bikaranîna tundûtûjiyê di girtîgehan de û derxistina cezayên darvekirinê ye.
Li hemberî vê rewşê, berpirsiyarî li ser milê her kesî ye, ji aktîvîstên sivîl bigire heta partiyan, ji xelkê asayî heta her dengekî azadîxwaz. Dem hatiye ku ev deng bigihêjin hev û ji perçebûn û belavbûnê derbas bibin.
Em bang li hemû partî, rêxistinên sivîl, aktîvîst û mirovên azadîxwaz dikin ku cûdahiyên xwe bidin aliyekê, gaveke hevbeş ji bo avakirina zincîra mirovî, amadebûna di qadên giştî de û afirandina dengekî komî ji bo parastina azadî, rûmeta mirovî û jiyana girtiyên siyasî bavêjin.
Ev bang ne tenê sekinandina li dijî darvekirin û bêdengkirinê ye, di heman demê de ragihandineke zelal ya li dijî şer, tundûtûjî û her cûre sepandina çarenûsên ji derve û hundir ve. Tenê bi rêya vê hevparbûnê sînorê bêdengkirinê dikare bê tengkirin û şansê afirandina paşerojeke cuda zindî bimîne.’’
Hêjayî gotinê ye Platforma Demokratîk a Navneteweyî ya Jinan, piştî şoreşa ‘Jin, Jiyan, Azadî’ li Rojhilatê Kurdistan û Îranê hatiye avakirin. Platform li ser mijara jinan, wekhevî û beşdariya wan a di jiyana siyasî û civakî de kar dike. Çalakiyên wan zêdetirî xwe li ser asta navneteweyî û navxweyî de tên kirin.
